AQSh prezidenti Donald Tramp Vashington Eronka qarshi asosiy harbiy maqsadlariga erishishga yaqin qolganini va Yaqin Sharqdagi keng ko'lamli amaliyotlarni qisqartirish masalasini ko'rib chiqayotganini aytdi. U 20 mart kuni Truth Social'da yozib, Amerika kuchlari o'z maqsadlarini bajarishga "juda yaqin" ekanini bildirdi. Bu haqda Dw.com xabar beradi.
Trampning aytishicha, bu maqsadlar qatoriga Eronning raketa salohiyati, uchirish tizimlari va ular bilan bog'liq infratuzilmani yo'q qilish, shuningdek uning mudofaa sanoatiga zarar yetkazish kiradi. U, shuningdek, Eronning dengiz va havo kuchlarini, jumladan havo mudofaasi tizimlarini yo'q qilishni sanab o'tdi va kampaniya Eronning yadro quroliga ega bo'lmasligini ta'minlash hamda mintaqadagi AQSh hamkorlarini, jumladan Isroil, Saudiya Arabistoni, Qatar, BAA, Bahrayn va Quvaytni himoya qilishga qaratilganini aytdi.
O'sha postning o'zida Tramp Hormuz bo'g'ozidagi xavfsizlikni AQSh emas, balki shu suv yo'liga qaram bo'lgan boshqa davlatlar ta'minlashi kerakligini ta'kidladi. U Vashington so'ralsa yordam berishi mumkinligini, biroq Eron tahdidi bartaraf etilgach, bunday yordam zarur bo'lmasligi kerakligini aytdi. Bundan oldin u NATOdagi ittifoqchilarni tanqid qilib, bo'g'ozni qayta ochishga yordam berishni istamayotganlikda aybladi, holbuki uning ta'rificha, xavf cheklangan edi.
Bu xabardan bir necha soat oldin Tramp jurnalistlarga Eron bilan o't ochishni to'xtatishni istamasligini aytdi. U Tehron harbiy salohiyatining katta qismini yo'qotganini aytdi va AQSh, uning so'zlari bilan aytganda, raqibini mag'lub etayotgan bir paytda sulh to'g'ri emasligini ta'kidladi.
“Zamin”ni Telegramʻda oʻqing!
