Pokiston bosh vaziri Shahboz Sharif Yaqin Sharqdagi murakkab vaziyatni barqarorlashtirish va mintaqaviy tinchlikka ko‘maklashish maqsadida «mazmunli va konstruktiv muzokaralar» uchun maxsus platforma yaratishga tayyorligini e’lon qildi.
«Pokiston mintaqada va undan tashqarida tinchlik va barqarorlikni ta’minlash uchun Yaqin Sharqdagi nizolarni tugatishga qaratilgan har qanday sa’y-harakatlarni olqishlaydi va to‘liq qo‘llab-quvvatlaydi», — dedi bosh vazir X ijtimoiy tarmoqdagi bayonotida.
Avvalroq Pokiston Tashqi ishlar vazirligi OAVni taxminlardan saqlanish va rasmiy bayonotlarni kutishga chaqirgan, shundan so‘ng AQSH va Eron rasmiylari o‘rtasida muzokaralar o‘tkazilishi mumkinligi haqidagi xabarlar tarqalgan.
23 mart kuni Donald Tramp Eron bilan diplomatik muzokaralarni e’lon qildi va mamlakatning energetika obyektlariga hujumlarni besh kunlik moratoriy bilan to‘xtatdi.
Maxsus elchi Stiv Uitkoff va biznesmen Jared Kushner Erondagi muhim shaxslar bilan muzokaralar olib borgan, ammo Tehron tomoni AQSH bilan har qanday aloqani rad etgan. Shu bilan birga, Turkiya, Misr va Pokiston so‘nggi kunlarda vositachi sifatida ishtirok etib, diplomatik qadamlarini faol olib borgan.
Axios va The Express Tribune ma’lumotlariga ko‘ra, Islomobod AQSH delegatsiyasi ishtirokidagi muzokaralar uchun qulay joy sifatida ko‘rib chiqilmoqda, bu esa mintaqadagi tinchlikka qo‘shimcha imkonlar yaratishi mumkin.
“Zamin”ni Telegramʻda oʻqing!
