Saudiya Arabistoni Ichki ishlar vazirligi 1447 hijriy yil, yaʼni 2026 yil haj mavsumiga tayyorgarlik doirasida Makka shahriga kirish va umra ibodatlarini bajarish tartiblarini yangiladi. Yangi qoidalarga ko‘ra, 2026 yil 13 apreldan boshlab Makkaga kirish uchun maxsus ruxsatnoma talab etiladi. Ushbu hujjati bo‘lmagan shaxslar shahar hududiga kiritilmaydi.
Ayrim toifalar uchun yengilliklar saqlab qolingan. Jumladan, Makkada rasmiy yashash ruxsatnomasiga ega fuqarolar, haj vizasi bilan kelgan ziyoratchilar hamda muqaddas hududlarda ishlash uchun elektron ruxsatnoma olgan shaxslarga cheklovlar tatbiq etilmaydi.
Umra vizasi bilan kelgan ziyoratchilar uchun mamlakatni tark etishning yakuniy muddati 2026 yil 18 aprel etib belgilandi. Shu sanadan keyin umra ruxsatnomalarini berish vaqtincha to‘xtatiladi va bu cheklov 31 maygacha davom etadi.
Bundan tashqari, 18 apreldan keyin haj vizasiga ega bo‘lmagan barcha xorijiy fuqarolarning Makkaga kirishi va shaharda bo‘lishi qatʼiy taqiqlanadi.
Vazirlik taʼkidlashicha, ushbu qoidalar haj mavsumini xavfsiz, tartibli va uyushqoq o‘tkazish uchun joriy etilgan bo‘lib, ularga rioya qilmaganlarga nisbatan qonun doirasida choralar ko‘riladi.
“Zamin”ni Telegramʻda oʻqing!
