Ukraina poytaxti Kiyevda sodir bo‘lgan halokatli otishma voqeasidan so‘ng mamlakat patrul politsiyasi rahbari Yevhen Jukov lavozimidan iste’foga chiqdi. Bunga voqea vaqtida ikki nafar politsiya xodimi fuqarolarni himoya qilmay, hodisa joyidan qochgani haqidagi ayblovlar sabab bo‘lgan.
Hodisa shanba kuni shaharning Holosivskiy tumanida yuz berdi. Qurollangan shaxs ko‘chada odamlarga o‘q uzib, keyinchalik supermarketda bir nechta kishilarni garovga olgan. Natijada olti kishi halok bo‘lib, 14 kishi jarohat olgan. Hujumchi esa politsiya bilan to‘qnashuvda yo‘q qilingan.
Ichki ishlar vaziri Igor Klimenko mazkur politsiyachilar vaqtincha xizmatdan chetlatilganini va ularning harakatlari yuzasidan tergov olib borilayotganini ma’lum qildi. Prezident Volodimir Zelenskiy esa ularni “harakatsizlikda” ayblab, jinoyat ishi qo‘zg‘atilganini bildirdi.
Rasmiylar ushbu voqeani terrorchilik harakati sifatida baholamoqda. Hujumchining ruhiy holati beqaror bo‘lgani aytilmoqda. Hozirda bir necha jabrlanganlar shifoxonada davolanishda davom etmoqda.
Mazkur hodisa urush davom etayotgan Ukrainada kam uchraydigan qurolli hujumlardan biri sifatida jamoatchilikda katta rezonans uyg‘otdi.
“Zamin”ni Telegramʻda oʻqing!
