Yaqin Sharqdagi geosiyosiy vaziyat yanada murakkablashmoqda. Eron rasmiylari AQSH bilan oʻt ochishni toʻxtatish boʻyicha kelishuvni uzaytirish masalasida qatʼiy pozisiya bildirdi.
Tasnim tarqatgan maʼlumotlarga koʻra, Tehron hukumati Donald Trampdan sulh muddatini uzaytirishni soʻramagan. Aksincha, Eron tomoni AQShni “mojaroda ustunlikka erisha olmagan taraf” sifatida baholamoqda.
Manbalarga koʻra, Tehron Vashington harbiy yoʻl bilan maqsadiga yeta olmasligini anglab yetgani va shu sabab mojarodan chiqishga urinayotganini taʼkidlamoqda. Shu bilan birga, Eron rahbariyati sulh hatto uzaytirilgan taqdirda ham xavf-xatarlar saqlanib qolishini bildirgan.
Xususan, Eron tomoni AQSH va Isroil tomonidan ehtimoliy terroristik harakatlar amalga oshirilishi mumkinligini istisno etmayapti. Bu esa Tehron tomonidan jiddiy xavf sifatida baholanmoqda.
Bundan tashqari, Hormuz boʻgʻozidagi vaziyat ham alohida eʼtibor markazida. AQSH tomonidan dengiz blokadasining davom etishi mojaroni yanada choʻzishi mumkinligi taʼkidlanmoqda. Eron esa ushbu strategik suv yoʻlini yopiq holda qoldirmasligini va zarurat tugʻilsa, uni kuch ishlatish orqali ochishga tayyor ekanini bildirgan.
Maʼlum boʻlishicha, 21 aprel kuni Eron AQSH bilan muzokaralarning yangi bosqichi uchun Pokistonga borishdan ham bosh tortgan. Bunga sabab sifatida Vashington tomonidan sulh shartlarining buzilgani va ortiqcha talablar qoʻyilgani koʻrsatilgan.
Shunga qaramay, Donald Tramp sulhni muddatsiz ravishda uzaytirish haqida bayonot bergan. Uning taʼkidlashicha, bu qaror Pokiston rasmiylarining iltimosi bilan qabul qilingan.
Eron parlamenti spikerining maslahatchisi Mahdiy Muhammad esa sulhni choʻzishdan maʼno yoʻqligini bildirdi. Uning fikricha, “yutqazgan tomon shart qoʻya olmaydi”, dengiz blokadasini davom ettirish esa amalda bombardimonga teng boʻlib, bunday harakatlarga harbiy javob qaytarilishi lozim.
Shu tariqa, tomonlar oʻrtasidagi qarama-qarshilik yanada chuqurlashib, vaziyat yangi keskin bosqichga oʻtish arafasida turgani kuzatilmoqda.
“Zamin”ni Telegramʻda oʻqing!
