Malayziyada yuraklarni larzaga solgan taʼsirli voqea sodir boʻldi. Bir erkak sakkiz yil avval xotirasini yoʻqotgan rafiqasi uchun yana bir bor toʻy marosimini tashkil qildi.
Mothership maʼlumotiga koʻra, ayol bir necha yil avval yoʻl-transport hodisasiga uchrab, ogʻir ahvolda komaga tushgan. U hushiga kelgach, na turmush oʻrtogʻini, na farzandlarini taniy olgan. Shuningdek, kundalik hayotdagi oddiy koʻnikmalarni ham qaytadan oʻrganishiga toʻgʻri kelgan.
Erkak bu davrni hayotidagi eng ogʻir sinovlardan biri sifatida eslaydi. Ayniqsa, oʻsha paytda farzandlari kichik boʻlgani uni yanada qiyin ahvolga solgan. Shunga qaramay, u taslim boʻlmasdan, rafiqasiga gʻamxoʻrlik qilishni va u bilan yangi xotiralar yaratishni davom ettirgan.
Qayta oʻtkazilgan toʻy marosimi oddiy, ammo samimiy tarzda tashkil etildi. Farzandlari va fotograf yordamida oʻtkazilgan tadbirda juftlik anʼanaviy liboslarda namoyon boʻldi. Erkak rafiqasini ehtiyotkorlik bilan marosim joyiga boshlab kirdi, ularni gulbarg sochib kutib olgan farzandlari esa bu lahzalarga yanada taʼsir baxsh etdi.
Marosimda avvalgi nikoh uzuklari qayta taqdim etildi. Koʻzlarida yosh bilan ayol turmush oʻrtogʻiga yillar davomida koʻrsatgan mehri va qoʻllab-quvvatlovi uchun minnatdorlik bildirdi. Bu voqea ijtimoiy tarmoqlarda katta qiziqish uygʻotib, haqiqiy muhabbat va sadoqat namunasi sifatida baholanmoqda.
“Zamin”ni Telegramʻda oʻqing!
