AQShlik ayol sog’lom farzandini 13 marta operatsiya qildirgani uchun qamoqqa tushdi

AQShning Texas shtatida istiqomat qiluvchi Keylin Boulin 8 yoshli o’g’lini 13 marotaba operatsiya qildirib, uning salomatligiga zarar yetkazgani uchun 10 yil qamoq jazosiga mahkum qilindi.

Ayolning turmush o’rtog’i so’zlariga qaraganda, farzandlari tug’ilgach, ona barchaga uning kasal ekanligini ta’kidlay boshlagan.

Vasiylik tashkilotlari tomonidan taqdim etilgan tibbiy hujjatlarga ko’ra, ayol 7 yil davomida turli shifokorlarga 323 marta murojaat qilgan va har biriga o’g’lining o’layotgani haqida aytib borgan. Ayol farzandi Kristoferni saraton va kamyob irsiy kasalliklar bilan og’rigan bemorga sifatida umumiy hisobda 13 marotaba operatsiya qildirgan.

Shifokorlar Boulin boladagi o’zgarishlarni sun’iy ravishda qo’zg’atayotganini tahmin qilgan bo’lsalar-da, ushbu jarayonlar davomida bolakay ko’plab diagnostik jarayonlarni boshdan kechirgan va ular bolakay salomatligiga zarar yetkazmasdan qolmagan.

Ushbu yili Dallas shifoxonasi xodimi vasiylik tashkilotlariga bolada saraton ham, boshqa turdagi kasallik ham yo’q ekanligi haqida qat’iy ravishda ma’lumot yetkazgan.

Xabarda aytilishicha, aynan shu sabab ayol uch farzandi uchun ham onalik qilish huquqlaridan mosuvo bo’ldi. Ayni paytda ayol qamoqxonada saqlanmoqda.
“Zamin” yangiliklarini “Twitter”da kuzatib boring