Rossiya qoʻshinlarining ikki kolonnasi Chernobil AESni tark etdi

^{Foto: Meduza}
Rossiya qoʻshinlari Chernobil AESni tark etib, Ukraina Ichki ishlar vazirligi Milliy gvardiyasining bir necha a'zosini asirga oldi. Bu haqda Slavutich (Chernobil AESdagi avariyadan keyin stantsiyaning evakuatsiya qilingan xodimlari uchun maxsus qurilgan shahar) meri Yuriy Fomichev oʻz videomurojaatida ma'lum qildi.

«Bugun koʻplab aholi punktlaridan dushmanning ketayotgani sezildi. Hozircha biz ular qaerga ketayotganini aniq bilmaymiz, lekin bilamizki, bizning yigitlar — bosqinning birinchi kundanoq AESda qoʻlga olingan va stantsiyani qoʻriqlagan Milliy gvardiyachilar Chernobil AESdan olib ketilgan. Ularni mashinalarda solib, olib ketishgan», — deydi Fomichev. U Milliy gvardiyachilar asirga olingan rossiyaliklar bilan almashtirilishiga umid qilmoqda.

30 mart kuni AFP agentligi Pentagondagi manbasiga tayanib, rossiyaliklar Chernobil AESni Belarus yoʻnalishida tark eta boshlagani haqida xabar berdi. Ertasi kuni Ukraina «Energoatom»ning xabar berishicha, 31 mart kuni ertalab rus harbiylari Chernobil AESdan chiqib ketayotgani haqida stantsiya xodimlarini xabardor qilgan, shundan soʻng ular ikki kolonna boʻlib Ukraina va Belarus chegarasi tomon yoʻl olgan. Rossiya qoʻshinlarining kichik bir qismi stantsiyada qolgan.

«Energoatom», shuningdek, rossiyalik harbiy xizmatchilar avariya zonasidagi eng zararli joy hisoblangan Qizil oʻrmonda istehkomlar qurayotganini, buning natijasida koʻpchilik goʻyoki «katta radiatsiya dozasini» olgani haqida ma'lum qildi. Avvalroq Chernobil avariya zonasini boshqarish boʻyicha davlat agentligi huzuridagi jamoatchilik kengashi a'zosi Yaroslav Emelyanenko ham rossiyalik askarlarning radiatsiyalangani haqida gapirgandi. Rossiya Mudofaa vazirligi bu ma'lumotga izoh bermagan.

Rossiya kuchlari urushning birinchi kunidayoq Chernobil AESni egallab olgandi. 9 mart kuni MAGATE Ukraina tashkilotga stantsiya xodimlarining rotatsiyasini ta'minlash soʻrovi bilan murojaat qilgani, chunki u erda urush boshlanganidan beri 210 kishi smena almshtirmasdan ishlagani haqida xabar berdi. 20 mart kuni, «Energoatom» stantsiyada xodimlarning qisman rotatsiyasi amalga oshirilganini xabar qildi.

30 mart kuni Rossiya Mudofaa vazirligi «Donbassni toʻliq ozod qilish boʻyicha operatsiyani yakunlash» maqsadida Rossiya qoʻshinlarini Kiev va Chernigov yoʻnalishlaridan olib ketish rejalashtirilayotganini e'lon qildi. “Zamin” yangiliklarini “Telegram”da kuzatib boring