Atir tez uchib ketyaptimi? Sababi siz o‘ylagandek emas!

Atir — bu shunchaki xushbo‘ylik emas, ayol obrazining vijdonga ta’sir qiluvchi, romantik va ehtirosli qismi hisoblanadi. Bir qarashda ko‘rinmas, ammo his etiladigan bu kuch insonda kayfiyat uyg‘otadi, xotiralarga muhr beradi va hatto taassurot qoldiradi. Ammo afsuski, ayrim ayollar tanlagan atirlari atigi bir necha daqiqada yo‘qolib ketishidan norozi bo‘ladi. Bu holatni ko‘pchilik parfyum sifatining pastligi yoki noto‘g‘ri tanlov bilan bog‘laydi. Aslida esa, atirning davomiyligiga ta’sir etuvchi omillar bundan ancha ko‘p va murakkab.

Quyida xushbo‘ylikning uzoq saqlanishiga to‘sqinlik qilayotgan eng keng tarqalgan to‘rt xatoni ko‘rib chiqamiz:

1. Quruq teri — atirning yashashiga dushman
Agar teringiz qurib turgan bo‘lsa, atirni qancha qimmatga olmang, hidi uzoq turmaydi. Sababi — quruq teri atirni yuzaga joylashtirish o‘rniga uni tezda yutib yuboradi. Hid tarqalishi uchun “namli asos” zarur. Bu muammoning eng oddiy yechimi — atir sepishdan avval teriga yengil, neytral krem surtish. Bunday holda parfyum terida saqlanish imkoniga ega bo‘ladi va uning notalari sekin-asta ochiladi.

2. Atirni havoga sepib yurish — samarasiz uslub
Parfyumni havoga sepib, uning tomchilari ostida aylanish vizual jihatdan jozibali bo‘lishi mumkin, ammo asl hid uchun bu foydasiz. Atir teri bilan to‘g‘ridan to‘g‘ri aloqa qilgandagina haqiqiy samara beradi. Umrov suyagi, tirsak ichi, ko‘krak ustki qismi va hatto tizza atrofi — hid tarqalishi uchun ideal nuqtalar. Tabiiy matolar ham xushbo‘ylikni uzoq vaqt saqlaydi — paltoning ichki qismi, sharf yoki ro‘mol — ajoyib variant.

3. Parfyum va tualet suvini farqlay oling
Ko‘pchilik atir va tualet suvini bir deb o‘ylaydi. Aslida, ularning tarkibida katta farq bor. Eau de toilette (tualet suvi) 5–15% xushbo‘y moddadan iborat bo‘lib, qisqa muddatga mo‘ljallangan. Agar siz uzoqqa cho‘ziluvchi hid istasangiz, EDP (eau de parfum) yoki extrait de parfum yozuvli flakonlarni tanlang. Bunday parfyumlar notalarga boy bo‘lib, terida uzoq saqlanadi.

4. Ob-havo va tana harorati — hidni boshqaradi
Qizg‘in havo yoki jismoniy faollik paytida tana harorati ko‘tariladi. Bu esa parfyum molekulalarining tezroq bug‘lanishiga sabab bo‘ladi. Natijada, hatto eng mukammal atir ham qisqa vaqtda yo‘qoladi. Qishda bir xil atir qattiq va og‘irroq ifor beradi, yozda esa u yengil va tez uchuvchan notalarga aylanadi. Shuning uchun mavsumga mos parfyum tanlash juda muhim.

Xulosa: Atir tanlashda faqat brendiga emas, teringiz holati, havo sharoiti va foydalanish usuliga ham e’tibor qaratish kerak. Shu tarzda siz atirdan maksimal ta’sir va lazzat olasiz.

Zamin.uz tahririyati parfyumeriya olamidagi siri ochilmagan mavzularni yoritishda davom etadi. Hidlar orqali xotira qoldiring — bu sizning ko‘rinmas imzongiz bo‘lib qolsin! “Zamin”ni Telegramʻda oʻqing!