Go‘sht iste’mol qilish normasi: yosh va faollikka qarab tavsiyalar

To‘g‘ri va muvozanatli ovqatlanish sog‘lom hayotning eng asosiy poydevorlaridan biri hisoblanadi. Ayniqsa, go‘sht mahsulotlarini to‘g‘ri miqdorda iste’mol qilish — bolalardan to keksalargacha, har bir insonning umumiy salomatligi, faolligi va kundalik hayot sifatini belgilab beradi.

Yosh guruhlar va bolalar uchun go‘sht miqdori

Inson organizmi o‘sish va rivojlanish davrida aql-ruhiy hamda jismoniy taraqqiyot uchun ozuqa moddalariga, ayniqsa, oqsil manbai sifatidagi go‘shtga ehtiyoj sezadi. 1-3 yoshdagi bolalar uchun tavsiya etilgan me’yor kuniga taxminan 75 grammni tashkil etadi. 4-6 yoshda bu ko‘rsatkich 100 grammga, 7-10 yoshda esa 120 grammga ko‘tariladi.

11-13 yoshli bolalar uchun esa jins bo‘yicha farq saqlanadi: o‘g‘il bolalar uchun 140 gramm, qizlar uchun esa 130 gramm. 14-17 yoshli o‘smirlar uchun mos ravishda 150 va 140 gramm go‘sht miqdori tavsiya etiladi.

Kattalar uchun normalar — kasb va hayot tarziga qarab

Go‘sht iste’mol qilish me’yori faqat yoshga emas, balki insonning hayot tarzi va mehnat faolligiga ham chambarchas bog‘liq. Aqliy mehnat bilan shug‘ullanadigan erkaklar uchun kuniga 140 gramm, ayollar uchun esa 120 gramm go‘sht miqdori yetarli deb topiladi.

Yengil jismoniy mehnat bilan shug‘ullanuvchi insonlar uchun 130–150 gramm, o‘rtacha og‘irlikdagi mehnat bilan shug‘ullanadiganlar uchun 140–160 gramm go‘sht iste’mol qilish tavsiya etiladi. Og‘ir mehnat bilan band bo‘lganlar esa har kuni 160–190 grammgacha go‘sht yeb turishlari kerak. Albatta, o‘ta og‘ir mehnat bilan shug‘ullanadiganlar uchun bu ko‘rsatkich 220 grammgacha yetishi mumkin.

Keksalar va yoshi ulug‘lar uchun maxsus me’yorlar

Salomatlikka e’tibor qaratish keksaygan davrda yanada muhim ahamiyat kasb etadi. 60–74 yoshdagi insonlar uchun kuniga 110 gramm go‘sht iste’mol qilish maqsadga muvofiq. 75 yoshdan oshganlar esa 100 gramm me’yorga amal qilishlari tavsiya etiladi.

Xulosa va mutaxassislar tavsiyasi

Go‘sht — oqsil, temir, sink va V guruhi vitaminlariga boy muhim mahsulot. Lekin uning me’yoridan ortiq yoki kam iste’mol qilinishi salomatlikka ta’sir ko‘rsatishi mumkin. Shu sabab har bir inson yosh, jismoniy faollik va umumiy sog‘lig‘idan kelib chiqqan holda go‘sht iste’mol qilish miqdorini to‘g‘ri belgilab olishi kerak.

Sog‘lom ovqatlanish va faol turmush tarzi — sifatli hayot kafolati! Mazkur me’yorlarga amal qilgan holda, har kuni o‘z salomatligingizga e’tibor bering. “Zamin”ni Telegramʻda oʻqing!