Tabiatning boy ne’matlaridan biri sifatida hisoblanadigan qora sedana asrlar davomida turli xil kasalliklarni davolashda keng qo‘llangan. Uning tarkibidagi foydali moddalar organizmning immun tizimini mustahkamlashda, yurak va qon tomirlari faoliyatini yaxshilashda, shuningdek teri va soch salomatligini qo‘llab-quvvatlashda, turli salbiy omillar va stresslarga qarshi kurashishda muhim ahamiyat kasb etadi.
Qora sedananing inson sog‘lig‘i uchun shifobaxshligi shundan iboratki, u nafaqat ichki organlarning faoliyatini yaxshilaydi, balki metabolizmni ham tartibga solishga yordam beradi. Shuningdek, u yurak-qon tomirlar tizimida qon aylanishini optimallashtirish va yurak ritmini mustahkamlashda ta’sirchan hisoblanadi. Organizmning immunitetini qo‘llab-quvvatlashi tufayli qora sedana odatiy ovqat ratsioniga qo‘shilsa, kasalliklarga qarshi tabiiy himoya qavati vazifasini bajaradi.
Kuniga bir choy qoshiq, taxminan 3–5 gramm urug‘ (yog‘ emas!) iste’mol qilish yetarli bo‘ladi, va bu miqdor qora sedananing foydali ta’sirini ta’minlaydi. Uni ovqatga qo‘shishda esa to‘g‘ri miqdor va tayyorlash uslubiga alohida ahamiyat berish kerak.
Kimlarga tavsiya qilinmaydi?
Qora sedananing foydali xususiyatlariga qaramasdan, uni hamma uchun tavsiya qilish mumkin emas. Ayniqsa, buyrak va siydik pufagida muammo bor kishilar sedana qo‘shib tayyorlanadigan taomlardan uzoqroq turishi lozim. Shu bilan birga, uning yuqori kaloriyaga ega ekani ham ahamiyatli — 100 grammida 560 kkal mavjud bo‘lib, shu sababli parhez qilayotganlar uchun qora sedanadan ehtiyotli foydalanish kerak.
Qanday sharoitda saqlash kerak?
Qora sedanani sifatini saqlash uchun uni qorong‘i va salqin joyda, germetik idish ichida saqlash muhim. Bu shartlarda u uch oygacha o‘z foydali xususiyatlarini yo‘qotmaydi. Agar uni yanada uzoq muddatda — yarim yilgacha saqlash lozim bo‘lsa, muzlatkichda saqlash tavsiya qilinadi, shu bilan u sifati buzilmasligi va aynimasligi ta’minlanadi.
