Shamollash mavsumi kirib kelishi bilan inson organizmiga yetarli vitamin va tabiiy quvvat manbasi kerak bo‘ladi. Shu paytda apelsinning o‘rni beqiyos — ko‘pchilik C vitamini haqida bilsa-da, bu sitrus mevaning fazilatlari aslo shu bilan cheklanmaydi. U ovqat hazm qilishdan tortib asab tizimigacha bo‘lgan bir qator muhim sohalarda organizmni qo‘llab-quvvatlaydigan biologik aktiv moddalarga boy.
Bitta yirik apelsin C vitaminining kunlik ehtiyojining taxminan 80 foizini ta’minlaydi. Askorbin kislotasi immunitetni mustahkamlash, yallig‘lanish jarayonlarini cheklash, tabiiy kollagen ishlab chiqarilishini rag‘batlantirish va qarish sur’atini pasaytirishda katta rol o‘ynaydi. Shuningdek, C vitamini yog‘ zaxiralaridan energiya olishda ishtirok etib, metabolizm jarayonlarini faollashtiradi. American Journal of Clinical Nutrition tadqiqotlariga ko‘ra, organizmdagi C vitamini kamligi vazn ortishi xavfini oshiradi.
Apelsin ovqat hazm qilish tizimini barqaror ishlatuvchi va ichak mikrobiomasini sog‘lom saqlovchi kletchatka manbai hisoblanadi. Qiziq jihati shundaki, bu kletchatkaning katta qismi mevaning o‘zida emas, balki apelsinning oq po‘stida joylashgan. Shuning uchun uni to‘liq tozalamasdan iste’mol qilish yanada foydaliroq.
Shuningdek, apelsin yallig‘lanishga qarshi ta’sir ko‘rsatuvchi flavonoid antioksidantlarga ancha boy. Ular erkin radikallarga qarshi samarali kurashib, tanani hujayra darajasida muhofaza qiladi. Olib borilgan klinik tadqiqotlar flavonoidlarning asab tizimi va ruhiy salomatlikka ijobiy ta’sirini namoyon qilgan — ular depressiya xavfini pasaytiradi, gerperidin esa Alsgeymer kasalligining rivojlanishini cheklaydi.
Apelsinning bir qarashda oddiy ko‘rinadigan, ammo juda foydali qismi — uning qobig‘i. Qobiqdagi oq, bir oz achchiq qatlam organizm uchun o‘ta qimmatli moddalarni o‘z ichiga oladi. Uni salatlarga, go‘shtli taomlarga yoki oddiy choyga qo‘shib iste’mol qilish mumkin — ham mazali, ham shifobaxsh.
Qish faslida immunitetni ko‘tarish, energiyani tiklash va organizmni sog‘lom saqlashni istaganlar uchun apelsin haqiqiy tabiiy dori hisoblanadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
