Zamonaviy tadqiqotlar qadimiy nafas olish amaliyotlarining inson salomatligi uchun foydali ekanini yana bir bor tasdiqlamoqda. Olimlar fikricha, kuniga bir necha daqiqa bajariladigan nafas mashqlari stressni kamaytirib, asab tizimini tinchlantirishi mumkin. Bu haqda BBC nashri xabar berdi.
Mutaxassislar ta’kidlashicha, aksariyat odamlar tez va yuzaki nafas oladi. Bu esa stress holatini kuchaytiradi. Sekin va chuqur nafas olish esa asab tizimini muvozanatga keltirib, organizmni xotirjam holatga o‘tkazadi.
Olimlar nafas mashqlari kortizol — stress gormoni miqdorini pasaytirishi, uyqu sifatini yaxshilashi va hissiy muvozanatni kuchaytirishini qayd etmoqda.
Mutaxassislar tavsiya qilgan eng samarali nafas mashqlari quyidagilar:
Siklik xo‘rsinish — burun orqali ikki marta nafas olib, og‘iz orqali sekin chiqarish. Bu usul asab tizimini tez tinchlantiradi.
Quti shaklida nafas olish — nafas olish, ushlab turish va chiqarish bir xil vaqtda bajariladi. U diqqatni jamlash va stressni boshqarishga yordam beradi.
4-7-8 usuli — 4 soniya nafas olish, 7 soniya ushlab turish va 8 soniya chiqarishdan iborat. Bu mashq uyquni yaxshilashda samarali hisoblanadi.
Muvofiq nafas olish — nafas olish va chiqarishni bir xil ritmda bajarish yurak ritmini barqarorlashtiradi va hissiy muvozanatni kuchaytiradi.
A52 usuli — 5 soniya nafas olish, 5 soniya chiqarish va 2 soniya tanaffus qilishga asoslangan. Bu mashq organizmni bo‘shashtirishda foydali sanaladi.
Olimlar fikricha, nafas mashqlarining eng muhim jihati — ularni muntazam bajarishdir. Kuniga atigi 3–5 daqiqa ajratish ham stressni kamaytirish va umumiy salomatlikni yaxshilashga yordam beradi.
“Zamin”ni Telegramʻda oʻqing!
