Xona sharoitida oʻstirish mumkin boʻlgan meva va sabzavotlar

Agar tomorqangiz boʻlmasa-yu, lekin oʻz qoʻllaringiz bilan biror narsa etishtirishni xohlasangiz, quyidagi ma'lumotlar siz uchun foydali boʻladi.

Avokado

^{Foto: «Domashniy ochag»}
Avakadoning mitti navlari xona sharoitida ham yaxshi oʻsadi. Avokadoni danagidan ham oʻstirish mumkin, lekin bu jarayon uzoq davom etadi va har doim ham muvaffaqiyatli boʻlavermaydi — koʻpincha bunday oʻsimliklar meva bermaydi, faqat yashilligi bilan egasini quvontiradi.

Agar koʻchatini sotib olgan boʻlsangiz, bu boshqa gap. Koʻchatni sirlanmagan sopol idishga koʻchiring — u oʻsimlik ildizidan kamida 25 sm kengroq va 2 barobar chuqurroq boʻlishi kerak. Tuproq qisman qumdan iborat boʻlsin. Avokadolarni muntazam sugʻorib turing, tez orada mehnatingiz samarasini koʻrasiz.

Sabzi

^{Foto: «Domashniy ochag»}
Sabzi juda chidamli oʻsimlikdir. Urugʻlarni oʻstirish uchun har qanday chuqur idish yoki konteyner toʻgʻri keladi. Idishni qumli, oʻgʻitli tuproq bilan toʻldiring va urugʻlarni 3-5 sm oraliqda eking. Nihol davrida tuproq har doim nam boʻlishi kerak. Nihollarning balandligi 5 sm ga etganda, zaif, yomon rivojlanganlarini olib tashlab, koʻchatlarni siyraklating.

Loviya

^{Foto: «Domashniy ochag»}
Binoning quyoshli tomonidagi balkonlarda loviya yaxshi oʻsadi. Bahor loviya ekish uchun eng yaxshi vaqt, harorat hali juda issiq boʻlmaydi. Loviyani tuproqqa, taxminan, 2,5 sm chuqurlikda, bir-biridan 15 sm masofa uzoqlikda eking. Loviya — tirmashib oʻsadigan oʻsimlik. Tuvak asosiga qulay boʻlishi uchun yogʻoch panjara oʻrnating.

Pomidor

^{Foto: «Domashniy ochag»}
Kvartirada pomidor etishtirish uchun oʻrta navlar mos keladi — roma yoki cherri kabi. Odatda oʻsimliklar vertikal joʻyaklarga ekiladi. Ammo yana bir variant bor — osib qoʻyiladigan bezakli idish. Pomidor quyosh nurini yaxshi koʻradi — meva pishishi uchun oʻsimlik kamida 12 soat quyoshda boʻlishi kerak.

Limon

^{Foto: «Domashniy ochag»}
Yorqin sariq mevalar bilan qoplangan yashil daraxt har qanday interer uchun ajoyib bezakdir. Bundan tashqari, gullagan limon xushboʻy hid chiqaradi. Limon urugʻini oʻstirish va parvarish qilish koʻp e'tibor talab qilishi mumkin, ammo natija bunga arziydi.

Ejevika

^{Foto: «Domashniy ochag»}
Ejevika butasiga juda koʻp joy kerak boʻlishi mumkin, shuning uchun bunday tajribalar katta balkon yoki lojali kvartiralarda amalga oshiriladi. Koʻchatlar neytral yoki kislotali tuproqda yaxshi oʻsadi (pH 5-7). Oʻsimlikka yaxshi sugʻorish tizimi va koʻp quyosh nurlari kerak. Ejevika muntazam ravishda sugʻorilishi lozim. Oʻsimlik juda koʻp mehnat talab qiladi, ammo natija albatta xursand qiladi. Ejevika vitaminlar va fermentlarga boy noyob rezavor meva hisoblanadi.

Golubika

^{Foto: «Domashniy ochag»}
Oʻsimlik koʻchatini kislotali (pH 4-5), yaxshi quritilgan tuproqqa koʻchiring va tuvakni quyoshli joyga qoʻying. Butalarga katta idish kerak boʻladi — kengligi kamida 45 sm, chuqurligi, taxminan, 50 sm. Muntazam sugʻorish va toʻgʻri parvarish qilsangiz, oʻsimlik tez orada birinchi mevalari bilan xursand qila boshlaydi.

Qulupnay

^{Foto: «Domashniy ochag»}
Qulupnayni urugʻdan etishtirish juda qiyin. Uyda oʻstirish uchun tayyor va yaxshi rivojlangan koʻchatlarni sotib olgan ma'qul. Oʻsimliklarga keng quti (qulupnay keng joyni yaxshi koʻradi) va engil, unumdor tuproq kerak boʻladi. Qaysi navni sotib olganingizga qarab, parvarish qilish boʻyicha koʻrsatmalar farqlanadi. Shartlar oddiy — muntazam sugʻorish, etarli quyosh nuri, tuproqni oʻgʻitlash va mehr bilan parvarishlash. “Zamin” yangiliklarini “Telegram”da kuzatib boring