Farg‘ona viloyatida axborot-kommunikatsiya texnologiyalari sohasida yana bir muhim qadam tashlandi — dunyodagi yetakchi texnologik kompaniyalardan biri Huawei o‘zining Farg‘onadagi yagona rasmiy filialini ishga tushirdi. Bu voqea nafaqat viloyat, balki butun vodiy miqyosida IT sohasini rivojlantirishda yangi bosqichni boshlab berishi mumkin.
Ofisning ochilish marosimi Farg‘ona shahridagi “Asia” mehmonxonasida o‘tkazildi. Tadbirda Farg‘ona viloyati hokimi Xayrullo Bozorov va Huawei kompaniyasi vakillari ishtirok etib, ikki tomonlama hamkorlik istiqbollari muhokama qilindi. Toshkentdan keyin ilk bor Farg‘onada ochilgan bu ofis viloyat yoshlari uchun IT va sun’iy intellekt sohasida yangi o‘quv va ish imkoniyatlarini yaratadi.
Hamkorlikning asosiy yo‘nalishlari quyidagilarni o‘z ichiga oladi:
- IT va raqamli texnologiyalar sohasida kadrlar tayyorlash;
- Oliy ta’lim muassasalari bilan qo‘shma loyihalar amalga oshirish;
- “Digital Fergana” konsepsiyasini amalga oshirish;
- Korxonalar uchun raqamli yechimlar va zamonaviy xizmatlar taklif etish.
Huawei kompaniyasi O‘zbekistonda 25 yildan ziyod faoliyat yuritmoqda va bu muddat mobaynida yurtimizda qator loyihalarni amalga oshirgan. Endilikda esa kompaniya Farg‘ona vodiysida ham AKT sohasini rivojlantirishga faol hissa qo‘shishni rejalashtirmoqda.
Tadbir yakunlari qanday bo‘ldi?
Ochilish marosimi doirasida Farg‘ona viloyati hokimligi va “Huawei Tech Investment Tashkent” MCHJ o‘rtasida anglashuv memorandumi imzolandi. Bu hujjat hamkorlikni yanada mustahkamlash, qo‘shma loyihalarni amalga oshirish va yosh mutaxassislar tayyorlashda asos bo‘lib xizmat qiladi.
Zamin.uz tahlilchilarining fikricha, bu kabi xalqaro hamkorlik loyihalari mamlakatimizda raqamli iqtisodiyot va ilg‘or texnologiyalar rivoji uchun poydevor bo‘ladi. Huaweining Farg‘onadagi hozirgi ishtiroki esa mazkur hududda AKT sohasini yangi bosqichga olib chiqishga xizmat qiladi.
“Zamin”ni Telegramʻda oʻqing! 
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
