O‘zbekiston xalqaro maydondagi savdo aloqalarini tobora kengaytirib bormoqda. Milliy statistika qo‘mitasi e’lon qilgan dastlabki ma’lumotlarga ko‘ra, joriy yilning yanvar-iyul oylari davomida mamlakatning tashqi savdo aylanmasi hajmi 44,4 milliard AQSH dollariga yetdi, deb xabar berdi idora.
Bu raqam o‘tgan yilning xuddi shu davrida qayd etilgan ko‘rsatkichdan 7,4 milliard dollarga ko‘pdir. Ya’ni o‘sish darajasi 19,9 foizni tashkil etgani qayd etildi. Bu holat mamlakat iqtisodiyotining jahon bozoridagi ishtiroki va barqaror rivojlanayotgani uchun muhim ko‘rsatkich sifatida baholanmoqda.
Eksport va import ko‘rsatkichlari
Ta’kidlanishicha, umumiy tashqi savdo aylanmasining 20,1 milliard dollari eksport hissasiga to‘g‘ri kelgan. Bu o‘tgan yilga nisbatan 34,9 foiz ko‘pdir. Import hajmi esa 24,3 milliard dollarni tashkil qilib, 9,9 foizga o‘sgan. Mutlaq ko‘rsatkichlarda eksportning sezilarli oshishi mamlakat ishlab chiqarish quvvati va mahsulot turlarining raqobatbardoshligi ortib borayotganidan dalolat bermoqda.
Savdo sheriklari va yetakchi mamlakatlar
Ayni paytda O‘zbekiston dunyodagi naqd 197 mamlakat bilan savdo munosabatlarini yo‘lga qo‘ygan. Bu esa mamlakatning xalqaro hamkorlik sohasida keng qamrovli imkoniyatlarga ega ekanini ko‘rsatadi.
Tashqi savdo aylanmasining asosiy ulushi Xitoyga to‘g‘ri kelmoqda — 18,2 foiz. Rossiya bilan savdo ulushi 16,1 foizni tashkil qilgan. Shuningdek, Qozog‘iston (5,9 %), Turkiya (3,6 %) va Koreya Respublikasi (2,2 %) ham O‘zbekistonning yetakchi hamkorlari sifatida qayd etilmoqda.
