Surxondaryo viloyati hokimligi ma’lumotiga ko‘ra, Sherobod tumanidagi tuz konida qiymati 15 million dollar bo‘lgan ekologik va tibbiy turizm kompleksi barpo etiladi. Loyiha Eronning Kapa Yurt Soon kompaniyasi tomonidan amalga oshirilishi ko‘zda tutilmoqda.
Uchrashuv va taqdimot
27-avgust kuni viloyat hokimi Eron kompaniyasi rahbari bilan uchrashdi. Suhbatda Xo‘jaykon tuz g‘orida amalga oshirilayotgan loyihalar taqdimoti o‘tkazildi. Investorlar texnik-iqtisodiy asoslar va kutilgan natijalar haqida ma’lumot berdi. Shuningdek, mutaxassislar ishtirokida joy tanlash, yo‘nalishlarni belgilash va bosqichma-bosqich amalga oshirish masalalari muhokama qilindi.
Hokimlikning bayonotida ta’kidlanishicha, Xo‘jaykon tuz g‘ori bo‘yicha “qator kompaniyalar”dan takliflar kelib tushgan, ammo Kapa Yurt kompaniyasi bilan “investitsiya loyihasi” allaqachon yo‘lga qo‘yildi.
Loyihaning yo‘nalishlari
Investitsiya dasturi 2025-yildan 2035-yilgacha uch bosqichda amalga oshiriladi. U quyidagilarni o‘z ichiga oladi:
- tuz qazib olish, qayta ishlash va qadoqlash liniyasini yo‘lga qo‘yish;
- tuz basseynlari, vannalar va sog‘lomlashtirish markazlari barpo etish;
- 500 o‘rinli 100 modulli mehmonxona qurish;
- amfiteatr, hunarmandchilik markazlari va tuz muzeyi tashkil etish;
- 200 mingga yaqin daraxt ekish va 1 gektar maydonda sun’iy sho‘r ko‘l qurish;
- hududni elektr, gaz, internet, mobil aloqa va temiryo‘l infratuzilmasiga ulash.
Iqtisodiy va ijtimoiy samara
Loyiha natijasida 250 ta yangi ish o‘rni yaratiladi. Har yili taxminan 200 ming mahalliy va xorijiy sayyohlar jalb etilishi kutilmoqda. Shu bilan birga, tuz sanoati eksporti yo‘lga qo‘yilib, mintaqadagi iqtisodiy imkoniyatlar yanada kengayishi ko‘zda tutilmoqda.
Turizm o‘sishi
Hokimlik ma’lumotlariga ko‘ra, oxirgi yillarda Surxondaryoga kelayotgan turistlar oqimi keskin oshgan. Masalan, 2018-yilda 21 ming xorijiy sayyoh tashrif buyurgan bo‘lsa, hozirda bu ko‘rsatkich bir oyning o‘zida 20 mingdan oshib ketmoqda. Bu esa yangi turizm loyihalari uchun katta talab va istiqboldan darak bermoqda.
“Zamin”ni Telegramʻda oʻqing!
