X ijtimoiy tarmog‘ida bir foydalanuvchining o‘ziga xos muvaffaqiyati keng muhokamalarga sabab bo‘ldi. U Anthropic kompaniyasining Claude sunʼiy intellekt chatbotidan foydalanib, o‘n yildan ortiq vaqt davomida kira olmagan 5 ta Bitcoin (taxminan 320 ming USD) mablag‘ini qayta tiklashga muvaffaq bo‘ldi. Bu haqda Cointelegraph.com xabar beradi.
Foydalanuvchi bir necha yil avval blockchain.info platformasida murakkab parollar o‘rnatgan, biroq ulardan birini unutib qo‘ygan edi. Dastlabki sakkiz hafta davomida u turli dasturlar yordamida milliardlab parollarni tekshirib ko‘rgan, ammo natija bo‘lmagan. Yakuniy urinish sifatida u o‘zining eski noutbuklari va kollej davridagi yozuvlarini Claude tizimiga yuklagan.
Sunʼiy intellekt foydalanuvchining ikki xil Mac kompyuteri, tashqi xotira qurilmalari, iCloud va Gmail xabarlarini o‘z ichiga olgan 1 gigabaytdan ortiq maʼlumotlarini tahlil qildi. Natijada Claude 2019-yilga oid muhim hamyon zaxira faylini topishga yordam berdi. Shundan so‘ng, foydalanuvchi eski daftarlaridagi eslatmalar yordamida parolni tiklab, Bitcoin hamyoniga kirish huquqini qo‘lga kiritdi.
Sanoat hisobotlariga ko‘ra, bugungi kunda taxminan 2,3 milliondan 4 milliongacha Bitcoin yo‘qolgan parollar yoki seed-fraza sababli foydalanish imkonidan mahrum bo‘lib qolgan. Bu umumiy kripto taklifining 11 foizdan 19 foizigacha qismini tashkil etadi.
Ushbu holat kriptovalyuta egalari uchun umid uyg‘otdi. Garchi foydalanuvchi to‘g‘ridan-to‘g‘ri dalillarni to‘liq oshkor qilmagan bo‘lsa-da, Blockchain.com maʼlumotlari 2015-yildan beri harakatsiz bo‘lgan 5 ta Bitcoin 13-may kuni boshqa manzilga o‘tkazilganini tasdiqlaydi.
“Zamin”ni Telegramʻda oʻqing!
