Foto: Dunyo
O‘zbekistonning Yaponiyadagi elchixonasi tomonidan Kambag‘allikni qisqartirish va bandlik vazirligi hamda Yaponiyaning Glosal Partner Cooperative, Japan Reigi Sahou va Muroo kompaniyalari o‘rtasida uchrashuvlar tashkil etildi, deb xabar bermoqda “Dunyo”.
Yapon kompaniyalari tomonidan mehmonxona, hamshiralik ishi, turar va noturar binolarni ta’mirlash, qurilish, avtomobillarni ta’mirlash, qishloq xo‘jaligi va qariyalarni parvarishlash singari sohalarda o‘zbekistonlik fuqarolarni ishga joylashtirishga tayyorlik ma’lum qilindi.
Muzokaralar natijasida kompaniyalar bilan mehnat migratsiyasi sohasida hamkorlik memorandumlari imzolandi, yiliga jami 400 nafar mamlakat fuqarolarini Yaponiyaga ishga joylashtirish bo‘yicha kelishuvlarga erishildi.
Muroo kompaniyasi bilan o‘zbekistonlik ishchilarni mazkur kompaniyaning o‘zida hamda hamkorlik yo‘lga qo‘yilgan kompaniyalarida ishga joylashtirish yuzasidan ham muzokaralar o‘tkazildi. Kompaniya vakillari yapon tilini o‘rgatishga ixtisoslashgan mamlakatimiz oliy o‘quv yurtlarida bakalavriatning oxirgi bosqichlarida o‘qiyotgan talabalarni o‘qishni bitirgunga qadar tayyorlab, kelgusida “yuqori malakali ishchi” toifasida Yaponiyada ishga qabul qilish rejalashtirilganini aytishdi.
Bu borada yapon kompaniyasi Tashqi mehnat migratsiyasi agentligi va oliy ta’lim muassasasi o‘rtasida uch tomonlama shartnoma asosida ishlarni tashkil etishga tayyor ekanligini ma’lum qildi. Shunda yiliga 100 nafarga yaqin O‘zbekistonlik fuqarolarini Yaponiyada ish bilan ta’minlanadi.
