O‘zbekistonliklar Saudiya Arabistoniga ishga yuborilishi kutilmoqda

^{Foto: Shutterstock}
O‘zbekistonning Jiddadagi Bosh konsulligida Saudiya Arabistonining Al-Zafer Hospital shifoxonasi bosh koordinatori Zohair Hebah bilan uchrashuv o‘tkazildi. Bu haqda “Dunyo” xabar berdi.

Unda O‘zbekiston fuqarolarini xorijda uyushgan holda ish bilan ta’minlash masalalari muhokama qilindi. Muloqot avvalida O‘zbekistonda sog‘liqni saqlash sohasini tubdan takomillashtirish, tibbiy xizmat ko‘rsatish va ta’lim sifati va samaradorligini oshirish, malakali tibbiy kadrlar tayyorlash, sohaga yangi boshqaruv usullarini joriy etish hamda jamiyatda sog‘lom turmush tarzini shakllantirish borasida olib borilayotgan keng ko‘lamli ishlar haqida ma’lumotlar Saudiya vakili e’tiboriga taqdim qilindi.

Zohair Hebahning aytishicha, O‘zbekistonda tibbiyot sohasi jadal sur’atlar bilan rivoj topib bormoqda. Shuningdek, o‘zbek shifokorlarining bilim va tajribasi hech bir xorijiy davlatlarning yetakchi tibbiyot vakillaridan kam emasligi ta’kidlandi.

“Aksariyat arab davlatlarida, jumladan, Saudiya Arabistonida ham O‘zbekistondan kelgan tajribali va malakali shifokorlar samarali faoliyat yuritib kelmoqda. Al-Zafer Hospital majmuasida xorijiy shifokorlar va hamshiralarga ehtiyoj mavjud. Biz ushbu bo‘sh o‘rinlarga O‘zbekistondan malakali mutaxassislarni ishga taklif etishdan mamnunmiz”, — deydi u.

Uchrashuv yakunida tomonlar bildirilgan takliflarni O‘zbekistonning tegishli vazirlik va idoralari xodimlari bilan birgalikda muhokama qilishga kelishib oldi. “Zamin”ni Telegramʻda oʻqing!