Farg‘onada ayol erining tushi tufayli fojiali tarzda halok bo‘ldi

Farg‘ona viloyatida shu kunlarda jamoatchilikni hayratga solgan mudhish voqea sodir bo‘ldi. “Bu kun” ko‘rsatuvi orqali ma’lum qilingan xabarga ko‘ra, erkak tushida ko‘rgan voqeasi sababli o‘z ayolini vahshiylarcha o‘ldirgan.

Qayd etilishicha, er-xotin voqea sodir bo‘lgan kechada odatiy tarzda uyquga ketgan. Ular orasida biron-bir kelishmovchilik yoki janjal kuzatilmagan. Ammo tonggi soat 4:30 atrofida erkak tushida ayolining xiyonat qilganini ko‘rib, keskin uyg‘onib ketgan.

Ayol bu vaqtda hali uyquda bo‘lgan va hech narsadan xabarsiz edi. Erkak esa yostig‘i ostida saqlagan pichog‘i bilan uyqudagi ayoliga 13 marta zarba bergan. Qilgan ishining xatoligini tushungan er shoshilinch tibbiy yordamga o‘zi murojaat qilgan.

Biroq, tibbiy xodimlar voqea joyiga yetib kelgan paytda ayol allaqachon hayotdan ko‘z yumgan edi.

Sud jarayonida ma’lum bo‘lishicha, erkakning bu kabi asossiz gumonlari ilk marta sodir bo‘lmagan. U avval ham ayoli bilan shunga o‘xshash sabablarga ko‘ra janjallashib kelgan ekan.

Sudlanuvchiga nisbatan O‘zbekiston Respublikasi Jinoyat kodeksining 97-moddasi (qasddan odam o‘ldirish) bo‘yicha ayblov e’lon qilinib, u 16 yilga ozodlikdan mahrum etildi. Voqea natijasida uch nafar farzand ham onasiz, ham otasiz qoldi.

Bu kabi mudhish voqealar oilaviy munosabatlarda o‘zaro ishonch va sabr-toqatning naqadar muhim ekanini yana bir bor ko‘rsatib berdi. “Zamin”ni Telegramʻda oʻqing!