Toshkentda dahshatli shamol fojia keltirdi: qurbonlar va jarohatlanganlar bor!

17 may kuni Toshkent shahrida kechki payt soat 19:00 lar atrofida ob-havo keskin yomonlashib, shaharni kuchli shamol va to‘zon qopladi. Bir necha soat oldin musaffo bo‘lib turgan osmon to‘satdan qorong‘ilashib, quyuq chang to‘zon bilan qoplandi. Shamolning kuchli shiddati shahar ko‘chalaridagi barglarni, chiqindilarni havoga ko‘tarib, aholiga jiddiy xavf tug‘dirdi.

Milliy telekanalning «Millar» ko‘rsatuvida berilgan xabarga ko‘ra, kuchli shamol oqibatida fuqarolardan biriga daraxt qulab tushib, og‘ir oqibatlarga olib kelgan. Mazkur fojiali holat oqibatida ikki kishi jiddiy jarohatlanib, zudlik bilan tibbiy muassasaga yetkazilgan.

Toshkent shahar shifoxonasining mas’ul shifokori Murod Qodirovning ta’kidlashicha, jabrlanganlardan biri tibbiyot muassasasiga olib kelingan paytdayoq juda og‘ir ahvolda bo‘lgan va shifokorlarning barcha harakatlariga qaramasdan, qabul bo‘limida vafot etgan.

Ikkinchi jabrlangan shaxsda esa og‘ir bosh-miya jarohati aniqlangan. Shifokorlar uning hayoti uchun uzoq va murakkab operatsiyani amalga oshirishgan. Ayni vaqtda uning ahvoli og‘ir bo‘lsa-da, stabil deb baholanib, u reanimatsiya bo‘limida davolanmoqda.

Shamol shaharning boshqa hududlarida ham katta zararlarga sabab bo‘ldi. Ayniqsa, shaharning markaziy va serqatnov ko‘chalarida bir nechta daraxtlar avtomobillar va avtobuslar ustiga qulab tushgan holatlar qayd etilgan. Xususan, Spark avtomobili va yo‘lovchi avtobusi daraxt ostida qolib, texnik zarar ko‘rgan, ammo bu hodisalarda baxtga ko‘ra insonlar jiddiy jarohatlanmagan.

Shamolning kuchli ta’siri oqibatida shahardagi ba’zi binolarning tom qismlari ham uchib ketgani kuzatilgan. Tezkor ravishda voqea joyiga yetib kelgan Favqulodda vaziyatlar vazirligi xodimlari, kommunal xizmatlar bilan birgalikda avariya oqibatlarini bartaraf etish ishlarini davom ettirmoqda.

Ushbu kuchli chang-to‘zonli havo oqibatida, ekologik vaziyat ham jiddiy yomonlashgan. Shu vaqtda Toshkent dunyoda havo ifloslanishi darajasi bo‘yicha eng yuqori o‘ringa chiqib qolgan. Bu esa aholi salomatligi uchun jiddiy xavfni yuzaga keltirmoqda.

Sog‘liqni saqlash vazirligi ushbu vaziyat yuzasidan aholiga maxsus tavsiyalar bilan chiqib, fuqarolarni zarurat bo‘lmagan hollarda ko‘chaga chiqmaslikka chaqirdi. Ko‘chaga chiqish zarur bo‘lganda esa tibbiy niqob yoki maxsus respiratorlardan foydalanish, xonada havo namligini oshirish uchun havo namlagichlar yoki xonaga ho‘l sochiq osib qo‘yish, ko‘p suv iste’mol qilish muhim ekanini ta’kidladi.

Shu bilan birga, Sanepidqo‘mita ham aholini ehtiyotkorlikka chaqirib, havo holati yaxshilanmaguncha ochiq havoda yurmaslikni maslahat berdi. Tibbiy yordam zarur bo‘lgan hollarda esa zudlik bilan «103» tez tibbiy yordam xizmatiga murojaat qilish mumkinligi aytilgan.

Hozirgi vaqtda shaharning turli hududlarida kuchli shamoldan zarar ko‘rgan daraxtlar, qulab tushgan tomlar va boshqa zararlar bartaraf etilmoqda. Ayrim hududlarda shamol oqibatlari hali ham kuzatilayotgan bo‘lsa-da, vaziyatning to‘liq barqarorlashuvi uchun maxsus xizmatlar tomonidan tezkor chora-tadbirlar amalga oshirilmoqda.

Mazkur fojiali voqea shahar aholisini ehtiyotkorlikka chaqirib, kuchli shamol paytlarida xavfsizlik qoidalariga qat’iy amal qilish zarurligini yana bir bor ko‘rsatdi. Aholi esa tabiatning bunday noqulay sharoitlari davom etayotgan vaqtda, muntazam ravishda ob-havo xabarlarini kuzatib borishi muhim ahamiyat kasb etadi. Zero, inson hayoti va sog‘ligi hamisha eng muhim qadriyat ekanligini esdan chiqarmaslik lozim. “Zamin”ni Telegramʻda oʻqing!