Ijtimoiy tarmoqlarda bandlik va mehnat vazirligi xodimlari ishtirokida bo‘lib o‘tayotgan videomajlisdan surat tarqaldi. Unda Samarqand viloyati Kattaqo‘rg‘on tumanidan ishtirok etgan xodimning ayol kishini tizzasiga o‘tqizib olgan holda ishtirok etgani aks etgan. Bu holat ijtimoiy tarmoqlarda keng muhokama qilindi va shundan so‘ng vazirlik o‘z munosabatini bildirib, vaziyatni “davlat xizmatchisining odob-axloq qoidalariga zid” deb baholadi.
Bandlik vazirligi mazkur vaziyat bo‘yicha qaror qabul qilib, mazkur xodimlar bilan mehnat shartnomasini bekor qilishni ma’lum qildi. Vazirlik shuningdek, o‘z tizimida xizmat intizomi va odob-axloq qoidalarini buzganlarga nisbatan murosasizlik prinsipiga amal qilishini ta’kidladi.
Vazirlikning bu munosabati davlat xizmatida odob-axloq qoidalarining muhimligini yana bir bor ko‘rsatib, barcha xodimlar uchun ushbu qoidalarga qat’iy rioya qilish kerakligini eslatib o‘tdi.
