Samarqand shahrida tez tibbiy yordam mashinasiga yo‘l bermagan Spark rusumidagi yengil avtotransport vositasi haydovchisi aniqlandi va ma’muriy javobgarlikka tortildi.
Hodisa joriy haftada shahar yo‘llaridan birida yuz bergan. Videokuzatuv vositalari orqali qayd etilgan holatga ko‘ra, Spark haydovchisi bir necha bor berilgan ovozli va yorug‘likli signallarga qaramasdan, tez yordamga yo‘l bermagan.
Natijada, tibbiy yordam ko‘rsatish uchun shoshilinch harakatlanayotgan mashina harakatini davom ettirish uchun qarshi yo‘lga chiqishga majbur bo‘lgan. Bu esa yo‘ldagi boshqa haydovchilar va piyodalar uchun xavf tug‘dirgan.
Haydovchi tezda aniqlanib, O‘zbekiston Respublikasi Ma’muriy javobgarlik to‘g‘risidagi kodeksning tegishli moddasi asosida jazolandi. Unga 5 baravar bazaviy hisoblash miqdorida — 2 million 60 ming so‘m miqdorida (5 BHM) jarima belgilandi.
Yo‘l harakati qoidalariga ko‘ra, tez tibbiy yordam, yong‘in o‘chirish va politsiya xizmatlari transport vositalariga barcha haydovchilar harakatni xavfsiz to‘xtatgan holda yo‘l berishi shart hisoblanadi. Bu qoida har bir haydovchi uchun majburiy hisoblanadi.
Huquqni muhofaza qiluvchi organlar haydovchilarni yana bir bor ogohlantirib, tez yordam va boshqa maxsus avtotransportlarga yo‘l berish kerakligini eslatib o‘tdi. Aks holda, ma’muriy jazo qo‘llanishi muqarrar ekanligi ta’kidlandi.
“Zamin”ni Telegramʻda oʻqing!
