Qashqadaryo viloyatida qalbaki spirtli ichimliklarning noqonuniy aylanishiga qarshi yo‘naltirilgan tadbir amalga oshirildi. Bosh prokuratura huzuridagi Departamentning Guzor tuman bo‘limi va tuman Ichki ishlar bo‘limi xodimlari hamkorligida o‘tkazilgan tezkor chora-tadbir davomida yirik miqdorda qalbaki alkogol mahsulotlari musodara qilindi.
Ma’lumotlarga ko‘ra, fuqaro A.X. o‘zining “Damas” rusumli avtomashinasida 3 xil turdagi, jami 750 dona qalbaki aksiz markalari bilan ta’minlangan spirtli ichimliklarni Dehqonobod tumani hududiga olib kirishga uringan. Uning rejasi – ushbu mahsulotlarni noqonuniy ravishda savdoga chiqarish bo‘lgan.
Huquq-tartibot organlari tomonidan o‘z vaqtida amalga oshirilgan choralar natijasida barcha mahsulotlar ashyoviy dalil sifatida hujjatlashtirilib, davlat foydasiga olib qo‘yildi.
Ma’lum qilinishicha, ushbu holat yuzasidan O‘zbekiston Respublikasi Jinoyat kodeksining 176-moddasi – “Qalbaki pul, aksiz markasi yoki qimmatli qog‘ozlar yasash va ularni muomalaga chiqarish” moddasi bo‘yicha jinoyat ishi qo‘zg‘atildi. Ayni paytda tergov harakatlari olib borilmoqda va barcha tafsilotlar o‘rganilmoqda.
