2025-yil 15-sentyabr kuni soat 05:40 larda Toshkentning Mirobod tumanidagi Gulsanam ko‘chasida yuzaga kelgan hodisa yo‘lovchilar orasida katta qiziqish uyg‘otdi. 101-sonli yo‘nalishda harakatlanayotgan MAN rusumli avtobus (saroy raqami 10, davlat raqami 01 897 OJA) TTZ bozori bekatida to‘xtash paytida yo‘l qatnov qismida paydo bo‘lgan cho‘kish oqibatida o‘ng tomoni bilan yerga botib qoldi, deb xabar berildi.
Dastlabki ma’lumotlardan ma’lum bo‘lishicha, bu hodisaga sababchi yo‘l infratuzilmasi va suv quvurlarining holati bo‘lgan. Avvalroq o‘tkazilgan suv quvurlari va yo‘l bo‘yicha suv oqishi yo‘l qatnov qismidagi mustahkamlikni pasaytirgan, shuningdek, avtobusning og‘irligi ham cho‘kishga olib kelgan. Bu esa yo‘lovchilar uchun vaqtincha qiyin vaziyatni keltirib chiqardi.
Voqea joyiga “5-Avtobus saroyi” filiali rahbari va mas’ul xodimlar zudlik bilan yetib bordi. Ular darhol tegishli chora-tadbirlarni amalga oshirdi va yo‘lda botib qolgan avtobusni soat 10:10 ga kelib to‘liq chiqarib olishga muvaffaq bo‘ldi. Shuningdek, avtobus sanitariya va texnik ko‘rikdan o‘tkazilgandan keyin o‘z yo‘nalishidagi xizmatini davom ettirmoqda.
