Yil boshidan beri 155 nafar qiz voyaga yetmasdan turmushga berilgan

Sog‘liqni saqlash vaziri Asilbek Xudayarov 14-oktyabr kuni Prezident rahbarligidagi selektor yig‘ilishi ortidan “O‘zbekiston 24” telekanaliga bergan intervyusida 2025-yil boshidan beri 15−17 yoshdagi 155 nafar qizning erta turmushga chiqqanini ma’lum qildi, deb xabar berdi UZ24.uz sayti.

Vazirga ko‘ra, Prezident yoshlar, ayniqsa qizlar o‘rtasidagi erta nikohlar haqida tanqidiy fikrlar bildirgan. Shuningdek, qarindosh-urug‘lar o‘rtasidagi nikohlar hamon uchrayotgani ta’kidlangan.

Vazirning aytishicha, bu holatlar nogiron farzandlarning tug‘ilish xavfini oshiradi. Shu bilan birga, bir kalendar yili ichida ikki marta homilador bo‘lish, salomatligi zaif, nimjon bolalar tug‘ilishi holatlariga sabab bo‘layotgani ham qayd etilgan.