Farg‘ona viloyatining Marg‘ilon shahrida ro‘y bergan navbatdagi yo‘l-transport hodisasi jamoatchilik e’tiborini tortdi. Ma’lumotlarga ko‘ra, Nexia-1 rusumli avtomobil haydovchisi piyodalar yo‘lagidan kesib o‘tayotgan 3 nafar maktab o‘quvchisini urib yuborgan, deb xabar berdi viloyat YHXB matbuot xizmati.
Hodisa kecha, 16-oktyabr kuni taxminan soat 12:30 larda sodir bo‘lgan. 1998-yilda tug‘ilgan haydovchi Marg‘ilon shahridagi “B.Marg‘iloniy” ko‘chasida harakatlanib ketayotgan paytda, 33-sonli umumta’lim maktabi oldida joylashgan piyodalar o‘tish joyiga yaqinlashgan. Shu zahoti yo‘lni kesib o‘tayotgan 3 nafar bolani payqamay, ularni urib yuborgan.
Dastlabki ma’lumotlarga ko‘ra, hodisa natijasida bir nafar o‘quvchi og‘ir jarohat olib, darhol shifoxonaga yetkazilgan. Qolgan ikki nafariga esa joyida birinchi tibbiy yordam ko‘rsatilgan.
Hozirda voqea yuzasidan Marg‘ilon shahar ichki ishlar bo‘limi tergovga qadar tekshiruv ishlarini boshlagan. Hodisa sabablari, haydovchining ayb darajasi va harakat xavfsizligi qoidalariga rioya qilinmagan holatlar o‘rganilmoqda.
Yo‘l harakati xavfsizligi inspektorlari ta’kidlashicha, ayni damda piyodalar, ayniqsa maktab yoshidagi bolalarning yo‘ldagi xatti-harakatlariga e’tibor qaratish muhim. Haydovchilar uchun esa maktablar oldidagi piyodalar o‘tish joylarida tezlikni pasaytirish — faqat qoida emas, balki inson hayotini saqlab qolish mas’uliyati hamdir.
“Zamin”ni Telegramʻda oʻqing!
