Toshkent viloyatining Ohangaron tumanida ichki ishlar xodimlariga hujum qilgan ikki yigitga nisbatan sud hukmi chiqarildi. Bu haqda sud manbalari ma’lum qildi.
Ma’lumotlarga ko‘ra, voqea 1-avgustdan 2-avgustga o‘tar kechasi ro‘y bergan. Ikki nafar yigit Samarqand shahridan Namangan tomonga yo‘lovchi sifatida yo‘lga chiqqan. Ular haydovchi Sirdaryo viloyati hududida yoqilg‘i quyish shoxobchasiga to‘xtagan paytda uning avtomashinasini olib qochishgan.
Hodisadan so‘ng Bo‘ka tumani ichki ishlar bo‘limi jinoyat qidiruv bo‘limi tezkor vakili, mayor Nuribek Shodiyev ularni to‘xtatib, ichki ishlar bo‘limiga olib ketmoqchi bo‘lgan. Biroq aybdorlardan biri xodimga pichoq bilan zarba berib, xizmat avtomashinasini ham olib qochgan.
Shundan so‘ng ular Ohangaron tumani bo‘ylab harakatlanishda davom etgan va Yo‘l-patrul xizmati inspektori ularni to‘xtatishga uringan. Ammo yigitlar inspektorning qonuniy talablariga bo‘ysunmasdan, mashinani xodim ustiga haydab og‘ir jarohat yetkazgan.
Bo‘ka tuman sudi ularni aybdor deb topdi: sud qaroriga ko‘ra, ulardan biri 9-yil 6 oy muddatga ozodlikdan mahrum etildi, ikkinchisi esa 15-yil 6 oyga qamaldi.
Eslatib o‘tamiz, so‘nggi haftalarda YPX xodimlariga nisbatan hujum holatlari bir necha hududlarda kuzatildi. Xususan, 2-noyabr kuni Farg‘ona yo‘li ko‘chasida haydovchi inspektorni kapotda sudrab ketgani haqida xabar qilingan, Samarqand va Farg‘ona shaharlarida ham shunga o‘xshash holatlar aniqlangan.
Mahalliy huquq-tartibot organlari haydovchilardan qonun talablariga qat’iy rioya etishni, politsiya xodimlariga qarshi harakatlar og‘ir jinoiy javobgarlikka olib kelishini eslatmoqda.
“Zamin”ni Telegramʻda oʻqing!
