Toshkent shahrida kecha kechki payt keskin tezlik va xavfli manyovr yana bir o‘ta og‘ir yo‘l-transport hodisasiga sabab bo‘ldi. Abdulla Qodiriy ko‘chasida ro‘y bergan avtohalokatda BMW avtomobili katta shiddat bilan qarama-qarshi yo‘nalishga chiqib ketib, Tracker bilan qattiq to‘qnashgani aytiladi. Guvohlarning so‘zlariga ko‘ra, zarba juda kuchli bo‘lgan — qattiq shikastlangan mashinalar esa voqeaning qay darajada og‘ir kechganini ko‘rsatib turibdi.
Hodisa ortidan tarmoqlarda tarqalgan ma’lumotlarga qaraganda, to‘qnashuv oqibatida bir yosh qiz halok bo‘lgani, shuningdek bir nechta yo‘lovchi va haydovchilar shoshilinch ravishda shifoxonaga olib ketilgani aytilmoqda. Mahalliy aholi va yo‘lovchilar hodisa joyiga bir zumda to‘planib, fuqarolar tez yordam chaqirishga harakat qilgan.
Toshkent shahar IIBB bu yuzasidan rasmiy bayonot berdi. Ma’lum qilinishicha, voqea bo‘yicha tergovga qadar tekshiruv ishlari boshlangan. Jabrlangan barcha fuqarolar tibbiy muassasaga yetkazilgan, ularning ahvoli shifokorlar nazorati ostida. Ichki ishlar organlari hodisaning aniq sabablarini, qatnashgan haydovchilarning harakatini va yo‘l qoidalariga rioya qilingan-qilinmaganini o‘rganmoqda.
Rasmiylar to‘liq va batafsil ma’lumotlar qo‘shimcha surishtiruvlar yakunlanganidan keyin e’lon qilinishi mumkinligini bildirishdi. Ayni vaqtda fuqarolar tezlikka rioya qilish va yo‘llarda xavfsizlikka jiddiy yondashish zarurligini yana bir bor eslatishmoqda.
Kechagi fojia katta shaharda yo‘l harakati qoidalariga loqayd munosabat qanchalik og‘ir oqibatlarga olib kelishini yana bir bor ko‘rsatdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
