Oʻzbekiston sogʻliqni saqlash vaziri Asilbek Hudoʻyorov deputatlar oldida chiqish qildi. Bu haqda Upl.uz xabar beradi.
Vazir dori vositalari uchun elektron retseptlar joriy etilishi boʻyicha tanqidlarga javob berdi. Hudoʻyorovning taʼkidlashicha, elektron retseptlar dori vositalarining nazoratsiz sotilishi bilan bogʻliq muammolar sabab joriy etilgan.
“Elektron retseptlar bizga hatto tushimizda koʻrina boshladi. Ushbu tizimni dorilarning salbiy taʼsirini oldini olish uchun joriy etdik.
Faqatgina 2025-yilda 24 mingta holatda bemorlar shifokor tavsiyasisiz dori qabul qilgani qayd etilgan. Shundan 418 ta holatda anafilaktik shok, 7017 ta holatda esa dori vositasi bilan zaharlanish holati kuzatilgan.
Faqatgina poytaxtda 741 ta shunday holat qayd etilgan. Shuningdek, ayrim fuqarolar dorilar yordamida oʻz joniga qasd qilishga uringan holatlar ham mavjud.
Joriy yil davomida 1500 nafar fuqaro dorilar yordamida oʻz joniga qasd qilishga uringan. Tizim shifokorlar va farmatsevtika kompaniyalari oʻrtasidagi korrupsiya xavfini kamaytirishga yordam beradi.
Elektron retseptda faqat xalqaro patentlanmagan dori nomi koʻrsatiladi. Klinik protokollarga koʻra, elektron retseptga beshtagacha dori vositasi kiritilishi mumkin.
Agar beshtadan ortiq dori kerak boʻlsa, bu konsilium qarori bilan asoslanishi lozim. Shifokorlar doimiy raqamli nazorat obyekti boʻladi.
Shifokorlarning maqomi oshadi. Tashxis va davolashni shifokor belgilashi kerak, farmatsevt yoki dorixona emas.
Elektron retsept tizimi davlat uchun ilgari mavjud boʻlmagan maʼlumotlar bazasini yaratadi”, — dedi vazir.
Mehmon guruhidagi foydalanuvchilar ushbu nashrga izoh qoldira olmaydi.
