30 dekabr kuni O‘zbekiston prezidenti Shavkat Mirziyoyev Yangi Toshkent shahri qurilishining birinchi bosqichi doirasida amalga oshirilayotgan ishlar bilan yaqindan tanishishi rejalashtirilgan. Davlat rahbarining mazkur tashrifi mamlakatda olib borilayotgan eng yirik shaharsozlik loyihalaridan biriga berilgan ustuvor ahamiyatni yana bir bor ko‘rsatadi.
Tashrif davomida Yangi Toshkent hududidagi keng ko‘lamli bunyodkorlik jarayonlari, xususan, zamonaviy yo‘l-transport infratuzilmasini barpo etish, muhandislik-kommunikatsiya tarmoqlarini torttirish, elektr va energetika tizimlarini shakllantirish ishlari bilan tanishilishi kutilmoqda. Shuningdek, aholi uchun mo‘ljallangan uy-joy massivlari, maktablar, bolalar bog‘chalari va ijtimoiy soha obyektlarining qurilish sur’atlari ham diqqat markazida bo‘ladi.
Yangi Toshkent loyihasi nafaqat poytaxt yukini yengillashtirish, balki minglab yangi ish o‘rinlari yaratish, aholi turmush sifati va shahar muhitini tubdan yaxshilashni maqsad qilgan. Prezidentga taqdim etiladigan hisobotlarda birinchi bosqich doirasida amalga oshirilgan ishlar, mavjud muammolar va kelgusi rejalar yuzasidan axborot berilishi rejalashtirilgan.
Kuzatuvchilar fikricha, mazkur tashrif Yangi Toshkent qurilishidagi ishlarni yanada jadallashtirish, loyihalarni aniq muddatlarda va sifatli tarzda amalga oshirishga qo‘shimcha turtki bo‘lishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
