14 yanvar kuni kechqurun Toshkent shahri markazida, Oloy bozori oldida jiddiy yo‘l-transport hodisasi sodir bo‘ldi. Dastlabki ma’lumotlarga ko‘ra, kamida olti nafar avtomobil ishtirokida zanjirli to‘qnashuv kuzatilgan.
Guvohlar va taqdim etilgan suratlarda KIA, BYD, Malibu-2, Tracker, Cobalt hamda Jetour rusumli mashinalarning bir yo‘nalishda harakatlanayotgan paytda bir-biriga urilib ketgani aks etgan. To‘qnashuv oqibatida bir necha avtomobilning old qismi jiddiy shikastlangan, ayrim mashinalar esa harakatlanish qobiliyatini yo‘qotgan.
Hodisa yo‘lning serqatnov qismida yuz bergani sababli, ushbu hududda transport harakati vaqtincha qiyinlashgan. Suratlarda ko‘rinishicha, yo‘l o‘rtasida to‘xtab qolgan mashinalar atrofida haydovchilar va yo‘lovchilar jamlangan, ayrimlar avtoulovlarni yo‘l chetga surishga harakat qilgan.
Hozircha jabrlanganlar bor-yo‘qligi haqida rasmiy ma’lumot berilmagan. Voqea joyiga yo‘l-patrul xizmati xodimlari yetib kelib, hodisa sabablarini o‘rganish va harakat xavfsizligini tiklash ishlarini olib borgan.
Mutaxassislar haydovchilarni yo‘l harakati qoidalariga qat’iy amal qilishga, ayniqsa kechki payt va gavjum chorrahalarda masofa saqlash hamda tezlikni oshirmaslikka chaqirmoqda. Toshkent markazida harakat jadal bo‘lgan paytlarda bunday bee’tiborlik yirik YTHlarga olib kelishi mumkin.
“Zamin”ni Telegramʻda oʻqing!
