So‘nggi kunlarda ijtimoiy tarmoqlarda xavotirli holat ko‘paydi: O‘zbekiston Milliy Olimpiya qo‘mitasi tashkilot raisining birinchi o‘rinbosari Otabek Umarov nomidan taniqli sportchilar va sport hamjamiyati vakillariga turli mazmundagi xabarlar yuborilayotgani qayd etildi. Qo‘mita matbuot xizmati bu kabi xatlar va murojaatlar rasmiy emas, ular feyk akkauntlar orqali tarqatilayotganini bildirdi.
Qo‘mitaga ko‘ra, ushbu “xabarlar”ning maqsadi aniq — ishonchga kirib olib, odamlarni aldash, ma’lumot yoki mablag‘ so‘rash orqali firibgarlikka urinish. Ya’ni gap oddiy “prank” emas: bu — to‘g‘ridan to‘g‘ri xavfli sxemaga o‘xshaydi.
Shu munosabat bilan Milliy Olimpiya qo‘mitasi muhim eslatma berdi: o‘zbek sportiga oid barcha rasmiy axborot, bayonot va yangiliklar faqat qo‘mitaning rasmiy axborot resurslari yoki tegishli federatsiya hamda assotsiatsiyalar orqali e’lon qilinadi. Demak, “men falonchiman” deb yozgan har qanday akkauntga ishonib ketish — o‘zingizga qiyinchilik chaqirish bilan barobar.
Nima qilish kerak?
Qo‘mita matbuot xizmati muxlislar va sport ahlidan quyidagilarni so‘raydi:
- bunday shubhali xabarlarga ishonmaslik;
- ularga javob qaytarmaslik;
- pasport, karta, kod, telefonga kelgan SMS kabi shaxsiy ma’lumotlarni umuman bermaslik;
- gumonli akkauntni darhol bloklash va unga nisbatan shikoyat (report) yuborish.
Qisqasi, bu yerda “menga yozibdi-ku” degan hissiyotga emas, sovuq aqlga ishonish kerak. Sportda ham qoida shu: himoya kuchli bo‘lsa, hujum o‘tmaydi.
“Zamin”ni Telegramʻda oʻqing!
