Ajrimdan keyin farzand ta’minoti uchun belgilangan aliment majburiyatlarini bajarmaslik holatlari bolalarning haq-huquqlariga ziyon yetkazmoqda. Afsuski, ba’zi ota-onalar o‘rtasidagi kelishmovchiliklar bola taqdiriga ham salbiy ta’sir ko‘rsatmoqda.
Fuqaro A.I. ham ana shunday mas’uliyatdan qochgan otalardan biri bo‘lib chiqdi. Sud qaroriga ko‘ra, u voyaga yetmagan farzandi uchun sobiq rafiqasi A.S. foydasiga aliment to‘lashi kerak edi. Biroq u o‘z burchini bajarmay, 20 million so‘mlik qarzdorlikka yo‘l qo‘ydi.
Qarzdor shaxs qidiruvga berilgan bo‘lib, uning manzili aniqlanmagan. Ammo bu vaziyatda kutilmagan hol yuz berdi — Majburiy ijro byurosi G‘allaorol tuman bo‘limi ijrochilarining harakatlari tufayli qarzdorning akasining rafiqasi — ya’ni bola uchun yanga 10 million so‘m aliment to‘lab berdi.
Yangasi bolaga moddiy yordam ko‘rsatishini unga bo‘lgan mehr bilan izohlab, “begunoh bola javobgar emas” deya ta’kidladi. U, shuningdek, farzand taqdiriga na ota, na ona befarq bo‘lmasligi kerakligini bildirib, vaziyatdan ko‘ngli xira bo‘lganini yashirmadi.
“Zamin”ni Telegramʻda oʻqing!
