O'zbekiston bojxona xodimlari tomonidan mamlakat hududiga noqonuniy ravishda giyohvandlik vositalarini olib kirishga qarshi qat'iy kurash davom ettirilmoqda. Xususan, Surxondaryo viloyatida navbatdagi qonunbuzarlik holatiga chek qo'yildi.
Viloyat bojxona boshqarmasiga qarashli "Sariosiyo" temir yo'l chegara bojxona postida qo'shni davlatdan kirib kelgan yuk poyezdi belgilangan tartibda nazoratdan o'tkazildi. Tekshiruv jarayonida bojxonachilarga maxsus o'rgatilgan xizmat iti yaqindan yordam berdi.
Xizmat iti yordamida poyezd tarkibidagi vagonlardan birining tag qismi ko'zdan kechirilganda, bojxona nazoratidan xufyona tarzda yashirilgan shubhali buyum borligi ma'lum bo'ldi. Rangsiz polietilen idishga joylangan ushbu modda marixuana ekanligi tasdiqlandi.
Topilgan giyohvandlik vositasi maxsus tarozida o'lchab ko'rilganda, uning og'irligi idishi bilan birgalikda 113,9 grammni tashkil etdi. Qonunbuzarlar ushbu usul orqali taqiqlangan moddani mamlakat ichkarisiga olib kirishga uringan.
Hozirgi vaqtda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda. Aybdor shaxslarni aniqlash va qonuniy chora ko'rish bo'yicha tegishli ishlar davom etmoqda.
“Zamin”ni Telegramʻda oʻqing!
