Toshkent shahrida Temur Malik va Buyuk Ipak yo‘li ko‘chalari kesishmasi yaqinidagi tunnel yo‘lida tirgak devorning bir qismi o‘pirilib tushdi. Hodisa yuz bergan hududga zudlik bilan avariya xizmatlari, texnik mutaxassislar hamda mas’ul tashkilotlar vakillari yetib borgan.
Voqea joyi tezda o‘rab olinib, xavfsizlik choralari kuchaytirildi. Toshkent shahar hokimligi ma’lumotiga ko‘ra, hozirda hodisa sabablari yuzasidan kompleks texnik tekshiruv olib borilmoqda.
Mutaxassislar dastlabki taxmin sifatida so‘nggi kunlardagi kuchli yog‘ingarchilik natijasida tuproqning ortiqcha namlanishi hamda konstruksiyaga tushayotgan yuklama ortganini ko‘rib chiqmoqda. Shu bilan birga, loyiha yechimlari, qurilish-montaj ishlari sifati, drenaj tizimi holati va qurilish nazorati masalalari ham batafsil o‘rganilmoqda.
Tekshiruv yakunlariga ko‘ra, tunnel devorini tiklash bo‘yicha qaror qabul qilinadi. Agar qurilish jarayonida kamchiliklar yoki qoidabuzarliklar aniqlansa, mas’ul shaxslarga nisbatan qonuniy choralar ko‘rilishi ma’lum qilindi. Favqulodda vaziyatlar vazirligi esa hodisa oqibatida jabrlanganlar yo‘qligini bildirdi.
“Zamin”ni Telegramʻda oʻqing!
