Navoiy viloyati Ichki ishlar boshqarmasi axborot xizmatiga ko‘ra, Navoiy shahridagi xususiy maktabgacha ta’lim muassasasida bolalarga nisbatan qo‘pol muomala qilgan va ularni kaltaklagan tarbiyachiga nisbatan jinoyat ishi qo‘zg‘atilgan.
Joriy yil 8 aprel kuni ijtimoiy tarmoqlarda ushbu bog‘cha tarbiyachisi bolalarga nisbatan zo‘ravonlik qilgani aks etgan video tarqalgan. Holat yuzasidan o‘tkazilgan tezkor surishtiruvlar davomida voqea 7 aprel kuni Navoiy shahar “Yangiariq” MFY hududidagi xususiy bog‘chada sodir etilgani aniqlangan.
Tergov ma’lumotlariga ko‘ra, 2003 yilda tug‘ilgan tarbiyachi E.N. o‘z guruhidagi bolalarni tartibga solish bahonasida muntazam ravishda urib, ularga jismoniy va ruhiy bosim o‘tkazib kelgan. U bolalarning himoyasiz holatidan foydalanib, bir necha bor zo‘ravonlik qilgan.
Mazkur holat yuzasidan Jinoyat kodeksining 110 moddasi 2 qismi bilan jinoyat ishi qo‘zg‘atilib, gumonlanuvchi protsessual tartibda ushlangan. Hozirda tergov harakatlari davom etmoqda.
“Zamin”ni Telegramʻda oʻqing!
