Farg‘ona viloyati Majburiy ijro byurosi tomonidan maʼmuriy jarimalarni undirish bo‘yicha olib borilgan navbatdagi tadbirlar o‘z samarasini berdi. Tekshiruvlar davomida bir fuqaroga tegishli bo‘lgan, jami 22 million so‘m qarz va 54 ta maʼmuriy jarima mavjudligi aniqlandi.
Qarzdorga tegishli bo‘lgan Spark rusumli avtomashina qidiruv tadbirlari natijasida topilib, belgilangan tartibda xatlandi hamda jarima maydonchasiga joylashtirildi.
Qizig‘i shundaki, avtomashina egasi o‘z mulkiga befarq emasligi namoyon bo‘ldi. U transport vositasini jarima maydonchasida uzoq qoldirishni istamadi. Shu kunning o‘zidayoq Majburiy ijro byurosiga kelib, barcha qarz va jarimalarni to‘liq qopladi.
Natijada, endi u hech qanday qarzdorliksiz, ko‘ngli xotirjam holda o‘z avtomashinasidan bemalol foydalanishi mumkin.
Xulosa o‘rnida: Qarzni o‘z vaqtida to‘lash — ortiqcha muammolarning oldini oladi. Aks holda esa, majburiy choralar qo‘llanilishi muqarrar.
“Zamin”ni Telegramʻda oʻqing!
