Foto: Prokuratura departamenti
Samarqand viloyati hududida energiya resurslaridan noqonuniy foydalanish bilan bog‘liq bir qator holatlar fosh etildi. Tekshiruv ishlari Bosh prokuratura huzuridagi Departamentning turli tuman va shahar bo‘limlari tomonidan amalga oshirildi.
Jomboy tumani bo‘limi o‘tkazgan tergovga qadar tekshiruvda fuqaro F.K. “Dehqonobod” mahalla fuqarolar yig‘ini hududidagi dala hovlisida umumiy elektr tarmog‘iga tijorat maqsadida noqonuniy ulanib, jami 324,4 million so‘mlik elektr energiyasidan asossiz foydalangani aniqlandi.
Shuningdek, Kattaqo‘rg‘on tumani bo‘limi tomonidan o‘rganilgan holatda “K.G.” MCHJ rahbari G.M. “Navbahor” MFY hududida joylashgan ishlab chiqarish sexini elektr tarmog‘iga ruxsatsiz ulab, 112,2 million so‘mlik elektr energiyasini noqonuniy isteʼmol qilgani maʼlum bo‘ldi.
Yana bir holat Samarqand shahar bo‘limi tekshiruvida qayd etildi. “Sh.S.” MCHJ rahbari D.Sh. shaharda foydalanishga topshirilgan ko‘p qavatli uyni tabiiy gaz tarmog‘iga o‘zboshimchalik bilan ulab, 241 million so‘mlik gaz resursidan noqonuniy foydalangan.
Barcha holatlar yuzasidan Jinoyat kodeksining 169-moddasi, yaʼni o‘g‘rilik alomatlari bilan jinoyat ishlari qo‘zg‘atilgan. Hozirda tergov harakatlari davom ettirilmoqda.
Qisqasi, mutasaddi idoralar energiya resurslaridan noqonuniy foydalanishga qarshi kurashni kuchaytirmoqda. Bunday qonunbuzarliklar esa kelgusida qatʼiy javobgarlikka sabab bo‘lishi taʼkidlanmoqda.
“Zamin”ni Telegramʻda oʻqing!
