Andijon viloyatida bank tizimida faoliyat yurituvchi mansabdor shaxs pora olayotgan paytda qoʻlga olindi.
Maʼlum qilinishicha, u viloyatdagi banklardan birining bosh boshqarmasida rahbar oʻrinbosari sifatida ishlagan. Mazkur shaxs kredit taʼminoti uchun garovga qoʻyilgan mulklarni sotuvga chiqarish vakolatiga ega boʻlgan.
U oʻz lavozimidan foydalanib, garovga qoʻyilgan mulkni past narxda rasmiylashtirib berish evaziga manfaat olishni rejalashtirgan. Xususan, Asaka tumanida joylashgan va qiymati 16,8 milliard soʻm boʻlgan tibbiyot markazi binosidan foydalanilgan.
Mazkur obekt avval auksiondan oʻtmay qolganidan soʻng, uning narxi sunʼiy ravishda tushirilib, tadbirkorga imtiyozli shartlarda berish taklif qilingan. Buning evaziga esa 90 ming AQSH dollari talab qilingan.
Davlat xavfsizlik xizmati tomonidan oʻtkazilgan tezkor tadbirda mansabdor 40 ming dollarni olayotgan vaqtda ushlanib, dalillar bilan fosh etilgan.
Hozirda mazkur holat yuzasidan jinoyat ishi ochilgan boʻlib, tergov ishlari davom etmoqda.
“Zamin”ni Telegramʻda oʻqing!
