Oʻzbekistonda nikoh barqaror, ajrimlar nisbati past saqlanmoqda
O'zbekistonda nikoh barqarorligi yuqori darajada saqlanmoqda, 2025 yilga kelib, nikoh barqarorligi koeffitsienti 175,6 promillega yetgan. Bu har 1000 ta nikohga o'rtacha 175 ta ajrim to'g'ri kelishini anglatadi. Boshqa davlatlar bilan solishtirganda, O'zbekistondagi ajrimlar darajasi ancha past, bu esa oila qadriyatlarining mustahkamligini ko'rsatadi. Shuningdek, ayrim viloyatlarda nikoh barqarorligi yuqori, ammo Toshkent shahrida ajrimlar ko'proq qayd etilmoqda.
2025 yil yakuniy koʻrsatkichlariga koʻra, Oʻzbekistonda nikoh barqarorligi darajasi nisbatan yuqori ekani yana bir bor tasdiqlandi. Rasmiy tahlillarga asosan, mamlakatda nikoh barqarorligi koeffitsiyenti 175,6 promilleni tashkil etgan. Bu esa har 1000 ta nikohga oʻrtacha 175 ta ajrim toʻgʻri kelishini anglatadi.
Oila va gender ilmiy-tadqiqot instituti mutaxassislari tomonidan olib borilgan tahlillar shuni koʻrsatmoqdaki, ushbu koʻrsatkich xalqaro miqyosda past hisoblanadi. Yaʼni, Oʻzbekistonda oilaviy munosabatlar barqarorligi koʻplab davlatlarga nisbatan yaxshiroq saqlanib qolmoqda.
Qiyosiy raqamlarga nazar tashlasak, ayrim mamlakatlarda ajrimlar darajasi ancha yuqori. Masalan, Moldovada bu koʻrsatkich 642,7 promille, Ozarbayjonda 431,9, Qozogʻistonda 328,2 va Qirgʻizistonda 289,6 promilleni tashkil etadi. Bu raqamlar fonida Oʻzbekistondagi holat ancha barqaror ekani yaqqol koʻrinadi.
Mutaxassislar fikricha, bunday natijalar jamiyatda oilaviy qadriyatlar mustahkam ekani, anʼanalar va ijtimoiy muhit nikohni saqlab qolishda muhim oʻrin tutayotganini anglatadi.
Hududlar kesimida qaralganda ham qiziq manzara kuzatiladi. Qashqadaryo, Xorazm va Surxondaryo viloyatlarida nikoh barqarorligi yuqori darajada saqlanayotgan boʻlsa, Toshkent shahri, Sirdaryo va Toshkent viloyatida ajrimlar nisbatan koʻproq qayd etilmoqda.
Qisqacha aytganda, statistika quruq raqam emas — bu jamiyat kayfiyati. Va hozircha signal pozitiv: oila instituti hali ham “stabil rejim”da ishlayapti.
Izohlar 0
…