O‘zbekistonda tashqi reklama va peshlavhalarni joylashtirish bilan bog‘liq tartiblar tadbirkorlar manfaati yo‘lida qayta ko‘rib chiqilmoqda. Bu haqda Raqobat qo‘mitasi ma’lum qildi.
Ma’lum qilinishicha, qo‘mita tashqi axborot vositalari va peshlavhalarga oid munosabatlarni tartibga soluvchi «Tashqi yozuvlarni tartibga solish to‘g‘risida»gi nizom loyihasini jamoatchilik muhokamasiga taqdim etgan.
Yangi hujjat orqali amaliyotda turli bahs va tushunmovchiliklarga sabab bo‘layotgan qator masalalarga aniqlik kiritish rejalashtirilmoqda. Ayniqsa, qonunchilikda mavjud bo‘lgan bo‘shliqlar va noaniq tushunchalarni bartaraf etishga alohida e’tibor qaratilgan.
Xususan, «tashqi axborot vositasi», «tashqi yozuv», «axborot ko‘rsatkichi», «peshlavha», «e’lon» va «ma’lumotlar taxtasi» kabi atamalarga rasmiy va aniq ta’rif berilmoqda.
Loyihada qayd etilishicha, tashqi axborot vositalari tashqi muhitga qaratilgan, ammo reklama yoki tijorat maqsadini ko‘zlamagan axborot shakli hisoblanadi. Shu sababli bunday vositalarga reklama xususiyatiga ega tasvir yoki axborot joylashtirishga yo‘l qo‘yilmaydi.
Shu bilan birga, tadbirkorlar uchun eng muhim yangiliklardan biri peshlavhalar bilan bog‘liq. Yangi tartibga ko‘ra, savdo va xizmat ko‘rsatish obyektlarida joylashtirilgan faoliyat turini bildiruvchi yozuvlar reklama sifatida baholanmaydi.
Masalan, «dorixona», «sartaroshxona», «supermarket», «milliy taomlar», «shifoxona», «qurilish mollari» yoki «AYOQSH» kabi yozuvlar oddiy axborot peshlavhasi sifatida qabul qilinadi.
Bu esa tadbirkorlar uchun katta yengillik bo‘lishi mumkin. Chunki bunday peshlavhalar uchun reklama pasportini rasmiylashtirish, qo‘shimcha ruxsatnoma olish yoki ortiqcha to‘lovlarni amalga oshirish talab etilmaydi.
Ya’ni tadbirkor o‘zi faoliyat yuritayotgan bino tashqi qismida o‘z nomi, ixtisosligi yoki mahsuloti haqida ma’lumot joylashtirsa, bu reklama hisoblanmaydi.
Mutaxassislar fikricha, mazkur o‘zgarishlar ayniqsa kichik biznes va xususiy tadbirkorlar uchun muhim ahamiyat kasb etadi. Chunki oxirgi vaqtlarda ayrim hududlarda peshlavhalarni ommaviy buzish holatlari tadbirkorlar noroziligiga sabab bo‘layotgan edi.
Xususan, Toshkent shahrida peshlavhalarni reklama sifatida baholash va ular uchun pasport talab qilinishi ko‘plab bahslarga sabab bo‘lgandi. 5 may kuni Prezident ishtirokida o‘tgan yig‘ilishda ham ushbu muammo ko‘tarilib, amaldagi ortiqcha tartiblarni bekor qilish bo‘yicha topshiriq berilgan.
Raqobat qo‘mitasi hujjat muhokamasi 25 apreldan boshlanganini va 10 mayga qadar davom etishini ma’lum qildi. Shu munosabat bilan tadbirkorlar va jamoatchilik vakillari loyiha yuzasidan o‘z taklif va fikrlarini bildirishga chaqirildi.
“Zamin”ni Telegramʻda oʻqing!
