Tashqi reklama va yozuvlarni joylashtirish tartibi tadbirkorlar manfaatidan kelib chiqib qayta ko‘rib chiqilmoqda. Bu haqda Raqobatni rivojlantirish va iste’molchilar huquqlarini himoya qilish qo‘mitasi ma’lum qildi.
Qayd etilishicha, “Tashqi yozuvlarni tartibga solish to‘g‘risida”gi nizom loyihasi ishlab chiqilgan bo‘lib, unda amaliyotda uchrayotgan tushunmovchiliklar va huquqiy bo‘shliqlarga aniqlik kiritish ko‘zda tutilgan.
Hujjatga ko‘ra, “tashqi axborot vositasi”, “tashqi yozuv”, “peshlavha” kabi tushunchalarga aniq ta'rif beriladi. Eng muhim yangiliklardan biri — peshlavhalar reklama sifatida baholanmasligi mumkin.
Ya’ni, savdo, umumiy ovqatlanish yoki xizmat ko‘rsatish obyektlarida tashkilot nomi va faoliyat turini ko‘rsatuvchi yozuvlar reklama hisoblanmaydi. Shu sababli, ular uchun alohida ruxsatnoma olish yoki to‘lovlarni amalga oshirish talabi bekor qilinishi mumkin.
Shu bilan birga, tijorat maqsadidagi reklama materiallari avvalgidek alohida tartib asosida nazorat qilinadi. Qo‘mita reklama mazmunining qonunchilikka mosligini kuzatishda davom etadi.
Mazkur loyiha jamoatchilik muhokamasiga qo‘yilgan bo‘lib, 10 mayga qadar takliflar qabul qilinadi. Mutasaddilar barcha tadbirkorlar va fuqarolarni ushbu jarayonda faol ishtirok etishga chaqirmoqda.
“Zamin”ni Telegramʻda oʻqing!
