Belarusda oʻzbek snayperchi qizining Ikkinchi jahon urushida koʻrsatgan jasorati haqida film suratga olinmoqda

Belarusda oʻzbek va belarus kinoijodkorlari bilan hamkorligida suratga olinishi kutilayotgan «Kazbek» va hozirda suratga olish ishlari davom etayotgan «Uzbechka» filmlari haqida matbuot anjumani boʻlib oʻtdi. Bu haqda Kinematografiya agentligi ma'lum qildi.

«Uzbechka» filmining suratga olish ishlari jarayonlari haqida

Kinematografiya agentligi buyurtmasiga binoan suratga olinayotgan «Uzbechka» filmining tasvirga olish ishlari Belarus davlatining Minsk shahrida davom etmoqda. Cinema of Central Asia kinostudiyasi tomonidan Akbar Bekturdiev rejissyorligida yaratilayotgan mazkur film oʻzbek snayperchi qizining Ikkinchi jahon urushida koʻrsatgan jasorati va boshidan kechirganlari haqida hikoya qiladi.

Filmning bosh rejissyori Firdavs Abduxoliqov va unda bosh rollarni yosh, iste'dodli aktrisa Aysanem Yusupova, Feruza Saidova, Yigitali Mamajonov, Oleg Taktarov, Lapanitsin Sergey, Milana Ivanova va boshqalar ijro qilmoqda.

Aktyor Yigitali Mamajonov filmning Aysenem Yusupova bilan bogʻliq suratga olish jarayonlari aks etgan lavhani e'lon qilgan edi.

Bundan tashqari Yigitali Mamajonov oʻzi gavdalantirayotgan obrazning nemis tilida hissiyotlarini tushuntirib berish jarayoni murakkab kechayotganini aytdi. U ob-havodagi oʻzgaruvchanlik suratga olish ishlariga halaqit qilayotganini ma'lum qildi.

«Kazbek» badiiy filmi haqida

Oʻzbekiston va Belarusning Kazbek nomi bilan mashhur boʻlgan haqiqiy qahramoni Mamadali Topiboldiev haqida badiiy film yaratiladi. Filmni Rossiyada xizmat koʻrsatgan san'at arbobi, operator, rejissyor va prodyuser Vladimir Krimov suratga oladi.

Kinokartina belarus va oʻzbek kinoijodkorlari hamkorligida suratga olinadi. Belarusning «Ulugʻ Vatan urushi» nomli muzeyida uning nomi sharaf bilan bitilgan. Kazbek har bir operatsiyani bitirgandan daraxt yoki devorga pichoq bilan Kazbek deb oʻyib yozgan. Gitler uning boshi uchun 50 ming marka mukofot puli berishini aytgan. Ushbu rolni mahoratli oʻzbek aktyori Ulugʻbek Qodirov oʻynashi rejalashtirilgan. “Zamin” yangiliklarini “Telegram”da kuzatib boring