Yulduz Rajabova hozirgi seriallarda koʻrinmayotgani va “Mendirman Jaloliddin”ning ommalashmagani sababi haqida gapirdi

^{Foto: Instagram /@yulduzrajabovaofficial}
Aktrisa Yulduz Rajabova “Taraflar” koʻrsatuviga bergan intervyusida nima sababdan shaxsiy hayoti haqida gapirmasligi, doʻst tanlashda adashgani, ekranlarda koʻrinish bermayotgani va “Mendirman Jaloliddin” serialining ommalashmagani sabablari haqida soʻzlab berdi.

“Hech qachon doʻstsiz bir oʻzim qolib ketaman, deb oʻylamaganman”

Birinchi navbatda inson shaxsiy hayoti haqida gapirishga tayyor boʻlishi kerak. Inson shaxsiy hayoti haqida yangi hayotga qadam qoʻyayotganda, oʻziga ishonch hosil qilgandan keyin aytishi kerak deb oʻylayman.

Hayotdagi tanlovlar borasida oʻzim ishongan 3-4 kishidan maslahat olaman. Bir vaqtlar atrofimda doʻstlarim bor edi, ammo vaqt oʻtib bitta oʻzim qolib ketgan paytlar ham boʻldi. Bu borada hech kimni aybdor qilmoqchi emasman, lekin Alloh sinov berganda oldimizda kim qolishini va qolmasligini koʻrsatib berar ekan. Hech qachon doʻstsiz bir oʻzim qolib ketaman, deb oʻylamaganman. Yaxshi ham shunaqa boʻldi, shundan keyin oʻzimni eshitishni boshladim.

Oʻsha paytda atrofimda qolgan 3-4 kishining fikri meniki bilan hamohang ekanini tushunib etdim. Bugungi kunda doʻst tanlamayman, atrofimda oʻzim ishongan yaqinlarim bor. Oʻrtoqlarim boʻlishi mumkin, lekin men ularni oʻzim ishongan toʻrt inson darajasiga qoʻymayman. Chunki hayotda nima boʻlishidan qat'i nazar, oila a'zolaringizdan tashqari boshqa hech kimga sizning sogʻligʻingiz ham, omadli va toʻgʻri boʻlganingiz ham kerak emas.

^{Foto: Instagram /@yulduzrajabovaofficial}
“Yangi loyihalardan takliflar bor, lekin hozirgi qilinayotgan narsalar professionalizm emas”

Kliplardagi rollarimni har bir inson uchun foydali deya olmayman, lekin doim oʻzimga, energiyamga yaqin narsa boʻlishini xohlaganman va shunaqa loyihalarda chiqishga harakat qilganman. Serial tufayli Turkiyaga ketdim, shuning uchun oʻzim ishlaydigan “Diydor” teatrida spektakllarga qatnasha olmadim. Endi Oʻzbekistonga keldim, teatrimizda spektakllar boʻlib oʻtishi rejalashtirilmoqda. Teatrni juda sogʻinganman. Rahmatli ustoz san'atkor Bahodir Yoʻldoshev olamdan oʻtganidan keyin teatrimiz huvillab qoldi.

Yangi loyihalardan takliflar bor, lekin hozirgi qilinayotgan narsalar professionalizm emas. Unaqa loyihalarga borib nima qilaman? Men loyiha ustida, xarakter ustida ishlashim kerak. U erda nima qilaman?

“Institutda oʻqigan paytimda stipendiyani olishim bilan turadigan uyimizning ijara haqqini berardim”

Institutda oʻqigan paytlarimda pul masalasida qiynalganman. Toʻrtta kursdoshim bilan nonni olib, kesib “suxarik” qilardik va butun kun davomida shuni eb yurar edik. Stipendiya olish uchun ijtimoiy fanlardan ham yaxshi bahoga oʻqiganman. Stipendiyani olishim bilan turadigan uyimizning ijara haqqini berardim. Inson oʻzini oʻzi eplay oladi, lekin oilasi bilan boʻlsa qaysidir narsalardan voz kechib pul ishlashiga toʻgʻri keladi.

“Mendirman Jaloliddin” serialida juda katta muhabbat bor

“Mendirman Jaloliddin” seriali haqida boshidan salbiy izoh berila boshlandi. Fikrlar faqat salbiy boʻldi. Men Ozodbek akaning fikrlarini tushundim, bu serial faqat biz uchun emas, tariximizni chet elga sotish uchun bizdagi jahon standartlariga mos boʻlgan aktyor, aktrisalarni koʻrsatish, jahon standartlariga mos boʻlgan loyiha yaratish uchun qilindi. Bir haftada serialning bitta qismi namoyish etildi. Boshqa mamlakatlarda ham seriallarning bitta qismi haftada bir marta chiqadi.

^{Foto: Instagram /@yulduzrajabovaofficial}
Hozirgi ikkinchi mavsumda ham shunday boʻladi. Biz 13 ta boʻlimni suratga olib kelgan boʻlsak, uni kuniga bir soatdan qoʻysak, 13 kunda tugaydi. Biz ham butun dunyoga moslab shu narsani qoʻllab koʻrmoqchimiz. Kunlik serial olish juda ham qiyin. Turkiyada, Qozogʻistonda yoki boshqa mamlakatlarda seriallarning bir qismi haftada bir marotaba berib boriladi. Bir haftada birinchi, ikkinchi haftada ikkinchi va uchinchi haftada uchinchi qismini taqdim etishadi, sifat ham shunga yarasha boʻladi.

Bir kunda 35 ta epizod suratga olinsa, serial sifatsiz boʻlib qoladi. Serialni tomosha qilish yoki qilmaslik har kimning oʻz fikri. Biz unga jonimizni berib ishladik. Yaxshi narsa chiqdi, juda ham katta mehnat bor boʻlgan loyiha boʻldi. Serialda juda katta muhabbat bor. “Zamin” yangiliklarini “Telegram”da kuzatib boring