“Garri Potter” haqidagi ilk ikki film muallifi Kris Kolambus HBO tomonidan suratga olinayotgan yangi serial haqida o‘z fikrini bildirib, uni tanqid ostiga oldi. The Hollywood Reporter’ning yozishicha, rejissyor loyihaning asl filmlar takrori bo‘lishi mumkinligidan norozilik bildirgan.
Dastlab Kris Kolambus remeyk g‘oyasini ijobiy qarshi olgan, uningcha, serial sehr-jodu olamini yanada kengroq ochib berishi mumkin edi. Ammo rejissyor yangi Rubeus Hagrid obrazi uchun olingan suratlarni ko‘rgach, fikri keskin o‘zgargan. U suratlarda Hagrid uchun ilgari yaratilgan eski liboslardan foydalanilganini ko‘rib, buni “deja vu” holatiga qiyoslab, bunday yondashuvdan foyda yo‘qligini ta’kidladi.
Shu bilan birga, Kolambus yangi Hagrid qiyofasini Nik Frost ijro etayotganidan mamnunligini yashirmadi. Biroq u, bir tomondan, yangi serialni tomosha qilishga qiziqayotganini aytsa-da, ikkinchi tomondan, loyihaning ijodiy yondashuvida yangilik yetishmasligini tanqid qildi.
Ma’lumot uchun, “Garri Potter” olamining qayta ishga tushirilishi haqidagi gap-so‘zlar ilk bor 2023 yil bahorida paydo bo‘lgan edi. Keyinchalik operator Adriano Goldman serialning ilk mavsumi 8 qismdan iborat bo‘lishini, butun loyiha esa o‘n yil davomida suratga olinishi kutilayotganini ma’lum qilgan. Ushbu vaqt ichida kamida yetti fasl taqdim etilishi rejalashtirilgan.
Serial ustida J.K. Rouling, Franchesko Gardiner, Nil Bler, Rut Kenli-Letts va Devid Xeyman prodyuser sifatida ishlamoqda. Yangi loyihada Garri Potter rolini Dominik Maklaflin ijro etadi. Arabella Stenton Germiona Grenger, Alaster Stout esa Ron Uizli obrazida namoyon bo‘ladi.
“Zamin”ni Telegramʻda oʻqing!
