Qozog‘istonning Aqtau shahrida o‘tkazilgan Xalqaro TURKSOY tashkiloti Doimiy kengashining 42-yig‘ilishida O‘zbekiston uchun juda muhim qaror qabul qilindi: Andijon shahri 2026 yil uchun Turkiy dunyoning Madaniyat poytaxti deb e’lon qilindi. Ushbu nufuzli tadbirda O‘zbekiston, Qozog‘iston, Turkmaniston, Ozarbayjon, Qirg‘iziston va Turkiyaning yuqori martabali madaniyat vazirlari va rasmiy vakillari ishtirok etdi.
Mustahkam aloqalar va strategik qaror
Yig‘ilish davomida TURKSOYning 2025 yildagi faoliyati atroflicha tahlil qilindi, 2026 yilga mo‘ljallangan tadbir lar rejasi hamda madaniy aloqalarni mustahkamlash masalalari muhokama etildi. Shuningdek, Turkiy davlatlar tashkilotining Gabalada qabul qilingan "TURKSOYni rivojlantirish va mustahkamlash to‘g‘risidagi qarorni amalga oshirish muhimligi qayd etildi". O‘zbekiston madaniyat vaziri Ozodbek Nazarbekov bu hujjatning xalqaro tashkilot maqomini yanada yuksaltirishini alohida ta’kidladi.
Andijon uchun ulkan imkoniyat
TURKSOY qaroriga binoan, bu maqomga ega shaharda bir yil davomida turli madaniy tadbirlar va festivallar o‘tkaziladi. Bu Andijonga milliy madaniyatni xalqaro miqyosda targ‘ib etib, sayyohlar oqimini oshirishga xizmat qiladi. Eslatib o‘tamiz, 2020 yilda O‘zbekistonning Xiva shahri ham ushbu nufuzli maqom bilan e’tirof etilgan edi. Andijonning 2026 yilgi Madaniyat poytaxti etib tanlanishi yig‘ilish ishtirokchilari tomonidan qizg‘in olqishlar bilan kutib olindi va tadbir yakunida tegishli qarorlar imzolandi.
Mehmon guruhidagi foydalanuvchilar ushbu nashrga izoh qoldira olmaydi.
