Bir urinishda katta shon-shuhratga erishgan, biroq shundan keyin katta sahnada ko‘rinmay qolgan qo‘shiqchilar haqida to‘xtalamiz. Lekin ularning taqdiri uchun xavotirga hojat yo‘q — atigi bitta qo‘shig‘i ularga umrining oxirigacha yetadigan daromad olib keldi. Ba’zan bitta xit butun kareraga muhr bo‘lib qoladi.
PSY — Gangan Style
2012-yil 2-noyabr kuni janubiy koreyalik xonanda PSY (Pak Che San)ning hayoti mutlaqo o‘zgarib ketdi: Gangan Style qo‘shig‘iga ishlangan klip YouTube tarixidagi eng ko‘p ko‘rilgan video maqomiga erishdi. Xit har hafta yangi rekordlarni sindirdi va 2014-yilga kelib 2 milliarddan ortiq tomoshabin to‘pladi. Google mutaxassislari hatto hisoblagich kodini yangilashga majbur bo‘lishdi.
PSY Ginnes rekordlar kitobiga ham kiritildi — jumladan, “Internetda birinchi 24 soat ichida eng ko‘p ko‘rilgan video” nominatsiyasi bo‘yicha. Shu bilan birga, qizig‘i shundaki, Gangan Style Pak Che Sanning yagona ulkan muvaffaqiyati bo‘lib qoldi. Undan so‘ng chiqarilgan 7 ta kompozitsiya omma e’tiborini avvalgidek o‘ziga torta olmadi va katta daromad ham keltirmadi.
Las Ketchup — The Ketchup Song
2002-yilda ispan opa-singillardan iborat Las Ketchup kvarteti butun dunyoga bir zumda tanildi. Ularning Asereje xiti va keyinchalik inglizcha versiyasi — The Ketchup Song millionlab odamlarning qulog‘ida hali ham yangraydi. Qiziqarli motiv, raqs harakatlari va o‘sha yillarning jozibasi bu qo‘shiqni haqiqiy fenomenga aylantirgan.
Guruh shu to‘lqinda Hijas del Tomate albomini chiqardi, ammo vaqt o‘tishi bilan shon-sharaf pasaya boshladi. 2006-yilda ikkinchi disk nashr etildi, birozdan keyin esa guruh tarqalgani ma’lum bo‘ldi. Vokalchilar hozir nima bilan shug‘ullanayotgani noma’lum, lekin ularning bir xit orqali moliyaviy holati yaxshilanib, tinch hayot kechirayotganiga amin bo‘lish mumkin.
Selin Dion — My Heart Will Go On
1980-yillarning boshida karerasini boshlagan Selin Dionni dunyoga tanitgan qo‘shiq — “Titanik” filmining asosiy saundtreki My Heart Will Go On. 1997-yilda aynan shu asar xonandani Gollivudning eng boy yulduzlar qatoridan joy oldirdi. Qo‘shiq deyarli barcha mashhurlar tomonidan qayta ijro etilgan bo‘lsa-da, Dion ijrosidagi versiya haligacha eng yuqori baholanadi.
Bugungi kunda Selinning 20 dan ortiq albomi, yuzlab mukofotlari va millionlab muxlislari bor. U hanuz gastrollarda, suratga olishlarda va yangi loyihalarda faol. 2018-yilda esa “Dedpul-2” uchun Ashes saundtrekini ham ijro etdi.
Los del Rio — Macarena
1993-yilda Ispaniyaning Los del Rio guruhi Macarena qo‘shig‘i va maxsus raqs harakatlari bilan butun jahonni “qizil chiroqdek” yoritib yubordi. 1996-yilda qo‘shiq AQSHda ham xitga aylanib, guruhning plastinkasi 4 milliondan ziyod nusxada sotildi.
Biroq “makarena” uzoqqa cho‘zilmadi — Los del Rio yigitlari shundan keyin katta miqyosdagi muvaffaqiyatga erisholmadi. Macarena Christmas yoki Baila Baila kabi qo‘shiqlar ham avvalgi omadni qayta takrorlamadi.
Kaoma — Lambada
1989-yilda fransuz Kaoma guruhi o‘zining ilk qo‘shig‘i — Lambada bilan birdaniga katta boylikka va mislsiz mashhurlikka ega bo‘ldi. Bu xit 80-yillar oxiridagi eng mashhur musiqiy asarlardan biri bo‘ldi. O‘sha paytda internet, YouTube yoki iTunes bo‘lmaganini inobatga olsak, guruhning bu darajadagi muvaffaqiyatga faqat gastrollar va jonli konsertlar hisobidan erishgani haqiqiy sensatsiya.
Bir qo‘shig‘i bilan tarixga kirgan Kaoma a’zolari keyinchalik bunday ulkan darajadagi xit chiqara olmagan bo‘lsa-da, Lambada ular uchun umrbod moliyaviy barqarorlik va nomi abadiy qoladigan meros yaratdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
