Xonanda Munisa Rizayeva kecha, 5 fevral kuni muxlislari uchun “Arzimaysan” nomli yangi qo‘shig‘ini taqdim etdi. Ushbu tarona xonanda Toir Axmed bilan hamkorlikda, duyet tarzida ijro etilgan.
Har bir qalbda umid bilan boshlangan, ammo afsus bilan yakun topgan hikoyalar bo‘ladi. “Arzimaysan” ana shunday bitmagan doston, so‘nib qolgan tuyg‘ular va puchga chiqqan orzular haqida so‘zlaydi. Aldangan ishonch, behuda sarflangan vaqt va yurakdagi og‘riqli armon har bir satr va har bir ohangda yaqqol aks etadi.
Mazkur duyet go‘yo ikki qalb o‘rtasidagi so‘nggi suhbatni eslatadi. Bir tomonda umidsizlik va xiyonat azobi, ikkinchi tomonda esa vaziyatni tan olishga majbur bo‘lgan qalbning sovuqqon va sokin ohangi jaranglaydi.
“Arzimaysan” — bu faqatgina ayriliq haqidagi qo‘shiq emas, balki o‘z qadrini anglab, ortga qaramasdan yashashga qaror qilgan insonning qat’iy tanlovidir.
Tarona singan yuraklarga malham bo‘lib, har qanday vaziyatda ham inson avvalo o‘zini qadrlashi lozimligini eslatadi.
Qo‘shiq muallifi va bastakori — Shahzod Azadov.
Qisqa fursat ichida ushbu duyet 35 mingga yaqin tinglanib, ijtimoiy tarmoqlarda 100 dan ortiq iliq izohlar qoldirildi. “Arzimaysan” qo‘shig‘i muxlislar tomonidan juda iliq kutib olindi.
“Zamin”ni Telegramʻda oʻqing!
